O evento, organizado pola Comisión de Festas de Aríns, contará cun animado percorrido polas aldeas da parroquia, no que participarán Xenerais, Correos, comparsas, charanga e coro, enchendo as rúas de música, sátira e espírito festivo.
Feira Cabalar de San Martiño de Francos, en Teo, celébrase cada 11 de novembro. A súa orixe remóntase ao ano 1557, o que dá conta da súa capacidade de supervivencia ao longo do tempo. Especializada en gando equino, hoxe en día é unha das citas principais neste sector, con compravenda de cabalos, maquinaria agrícola, artesanía, téxtiles e complementos relacionados coa práctica equina e os produtos da terra de outono. A feira desenvólvese nunha carballeira de gran riqueza, situada no Camiño Portugués.
A Feira tradicional dos Remedios de Ponteareas pon en valor o mundo rural e os oficios tradicionais. Neste caso, faino a través da recreación da vida cotiá na primeira metade do século XX, axudando á promoción do produto artesán galego. Desenvólvese cada ano durante a primeira semana do mes de setembro.
Celebrada cada mes de maio coincidindo coa honra a San Cidre, patrón do agro, esta festa naceu nos anos 70 como unha exaltación da vida labrega e das raíces rurais de Galicia. O seu elemento máis distintivo é o desfile de carrozas construídas artesanalmente pola veciñanza, representando con creatividade as antigas tarefas do campo como a vendima, as mallas, a sega ou a recollida do millo.
A Semana Santa do Carballiño comezou a organizarse en 1893, ano en que se fundou a parroquia de San Cibrao do Carballiño. Ao longo do tempo desenvolveu características propias, como a forma de procesionar (dobre ombreiro ou falso costal) ou composicións musicais singulares. A isto súmaselle unha programación paralela, con actividades como exposicións e ciclos de conferencias, publicacións ou concertos de música sacra.
Esta festa de Castro Caldelas recibe este nome polos fachós, os feixes de palla de forma cilíndrica amarrados nuns atados feitos da mesma palla que están iluminados nunha gran procesión que percorre as rúas desta vila medieval e que remata na gran fogueira situada no adro do santuario de Nosa Señora dos Remedios baixo o repenique de campás.
A Festa da Pataca celébrase anualmente o terceiro domingo de setembro e as súas orixes remóntanse ao ano 1980. Nela únense patrimonio, tradición e gastronomía. Trátase dunha manifestación cultural e social de enaltecemento do produto da pataca de Coristanco, froito nesas terras da dedicación ao traballo de agricultores e produtores.
A Festa da Vendima xorde no ano 1963 da man do concello e celébrase a partir do ano 2000 o último domingo de agosto.
A vinculación do viño coa festa e a ledicia son tan antigas como o mesmo home e moito máis cando se trata dun bo viño de Leiro. Como dicía o bispo de Ourense en 1626: “os viños máis xenerosos son os das ribeiras do Avia, celebrados en toda a monarquía e moi solicitados en Flandres, Holanda e Inglaterra”. Por iso en Leiro, o viño se fai festa e a festa faise viño. Trátase dunha expresión da nosa cultura, a nosa arte e do noso xeito de ver e entender a vida.
A Malla Tradicional de Doade (Lalín), é un dos grandes eventos etnográficos da Galicia interior, promovido anualmente desde hai 22 anos polo Museo Etnográfico Casa do Patrón o penúltimo sábado de agosto en Codeseda (Lalín).
A Romaría do Corpiño, na parroquia de Santa Baia de Losón en Lalín, destaca, entre outros motivos, pola autenticidade da procesión en que a Virxe vai portada polos veciños mentres os devotos forman unha longa ringleira arredor do santuario para que a imaxe pase sobre as súas cabezas.
