Organizado pola Asociación Cultural Meiro, ten lugar unha feira gastronómica que é a culminación dun traballo que abrangue todo o ano e que ten por obxecto a recuperación etnográfica, educativa, cultural e gastronómica do millo corvo. É esta unha variedade de millo de cor negra, case extinguida na comarca do Morrazo, que se fai coa participación de asociacións e centros educativos.
En épocas remotas, os galegos celebraban a chegada da primavera e o remate do cru inverno e propiciaban deste xeito a obtención de boas colleitas. Nos tempos actuais, as festas dos maios son a última manifestación folclórica que festexa en Galicia o final do inverno. Constrúense figuras con elementos naturais, como musgo, flores silvestres, ovos, paus e arredor delas cántanse, con acompañamento de paus, coplas e cancións irónicas e críticas con feitos ou personaxes de actualidade.
A primeira fin de semana de xuño celébrase en Bande a Festa do Peixe, que xa pasa dos 40 anos, coa intención de promover a riqueza gastronómica, así como dar a coñecer as potencialidades turísticas da zona cun concurso de pesca.
O seu nacemento débese á iniciativa dun grupo de amigos que compartían a súa paixón pola pesca e decidiron organizar un concurso que se repite ano tras ano ata a data de hoxe. O seu arraigo superou o paso do tempo, e na actualidade é unha das máis antigas de Ourense.
Cada Venres Santo, o requeixo e o mel protagonizan nas Neves unha cita gastronómica que deu os seus primeiros pasos no ano 91. Visitantes procedentes de toda Galicia achéganse a esta localidade atraídos polo requeixo, que se degusta acompañado polo mellor mel da cooperativa ou polos viños tintos de Rubiós. Alén destes produtos representativos da zona, na feira non faltan outros pratos como o polbo á feira, os chourizos ao viño e, por suposto, a música.
As xentes de Lestedo, a uns 15 quilómetros de Santiago de Compostela, resístense a rematar o Entroido, e o domingo de Piñata (o seguinte ao martes de Entroido) celebran a Festa da Filloa. O obxectivo que perseguen desde o ano 1984 é popularizar unha das sobremesas máis tradicionais de Galicia, que nas datas de Carnaval cobra especial protagonismo nas casas e nos restaurantes.
A posta en escena da Paixón, Morte e Resurrección de Cristo que ten lugar na pequena parroquia de Santa María de Paradela (Meis, Pontevedra) sorprende gratamente polo esmero da posta en escena, o coidado do vestiario e dos escenarios onde descorren os actos. A calidade da interpretación dos actores logra transmitir ao público o sentimento profundo da fe cristiá. Por iniciativa da Confraría de Semana Santa e Pascua, nacida en 1993, todos os fitos que marcan as horas previas á morte de Xesús Cristo e a súa posterior resurrección son coidadosamente representados.
Un produto rei da cociña atlántica, procedente do mar, ten o seu feudo no Carballiño, a 80 quilómetros da costa. A orixe desta contradición está en que era o pagamento en especie que se facía na Idade Media ás ordes monásticas de Oseira pola explotación das súas posesións portuarias nas Rías Baixas. As xentes do Carballiño, en concreto as das parroquias de San Xoán de Arcos e de Santa María de Arcos, propiedades tamén do mosteiro de Oseira, eran as encargadas do seu transporte, preparación e venda no mercado.
A Entidade Local Menor de Bembrive acolle desde hai máis de 350 anos a que está considerada como unha das festas máis populares de Galicia: o San Brais de Bembrive. Trátase dunha festividade de transmisión interxeracional na que, cada 3 de febreiro, se xuntan devotos do Santo, así como da música ou da gastronomía. Entre os elementos que definen esta festa destaca a romaría, o rito de poñer unha candea ao Santo contra os males da gorxa, gozar do viño nos furanchos ou comer a cachucha do porco.
Pouco podía imaxinar Avelino Cachafeiro, cando en 1924 foi proclamado o mellor gaiteiro de Galicia, que o seu nome sería honrado na súa vila natal tantos anos despois e cunha festa de gran magnitude. Soutelo de Montes, no concello de Forcarei, convértese na capital da gaita co gallo da Festa do Gaiteiro, na que se se reúnen arredor de 750 músicos, e á que acoden espectadores e autoridades de todo o territorio galego e de Portugal. A festa celébrase anualmente, de xeito ininterrompido, desde o ano 1979.
Celébrase o luns de Pentecoste.
No santuario de Nosa Señora das Virtudes na Ponte de Arante lévase a cabo unha das romaxes máis destacadas do Concello de Ribadeo, onde é costume bendicir os campos (para protexer as colleitas) e cantar rogativas, tradicións que datan do s. XV. Asemade, esta festa serve para conmemorar a batalla e vitoria dos veciños das sete parroquias contra o exército de Napoleón, pois neste mesmo lugar, aló polo ano 1809, desenvolveuse a loita entre os veciños e o exército de Napoleón.
