Actuacións de posta en valor sobre bens do patrimonio arqueolóxico

Custo total da operación: 993.480,00 € 
Axuda FEDER: 790.366,86 €
Obxectivo: Mellorar a conservación, protección, posta en valor e difusión de bens do patrimonio arqueolóxico galego
Situación: Concellos de Sobrado (A Coruña), Castro de Rei (Lugo), Campo Lameiro (Pontevedra) e San Amaro e Punxín (Ourense)
Temporización: Primeiro semestre 2016 - decembro 2020

 

Actuación:

Realización dunha serie de actuacións de investigación, restauración e difusión sobre varios bens do patrimonio arqueolóxico galego propiedade da Xunta de Galicia coa finalidade de mellorar a súa conservación, protección e posta en valor.

Campamento romano de Cidadela (Sobrado, A Coruña). Este xacemento arqueolóxico destaca polos seus valores científico e patrimonial, así como polo seu potencial como recurso cultural. O obxecto da proposta é levar a cabo un plan global de actuación que permita a investigación, a conservación e a protección do xacemento de cara á súa posta en valor e visita pública. As actuacións inclúen a escavación arqueolóxica, a consolidación e a restauración dunha área do xacemento que permita protexer e contemplar os restos arqueolóxicos postos ao descuberto en anteriores campañas e incluílos nun circuíto mínimo de visita. Así mesmo, prevense actuacións de sinalización e de difusión, como a creación dun itinerario de visita, carteis explicativos das distintas áreas do xacemento arqueolóxico etc.

Castro de Viladonga (Castro de Rei, Lugo). Trátase dun dos xacementos arqueolóxicos máis senlleiros de Galicia e dos máis coñecidos e visitados polo público. Dado o seu excepcional valor patrimonial, ten a condición de Ben de Interese Cultural, segundo o Decreto 441/2009. A actuación consiste en levar a cabo un plan de conservación preventiva, en varias fases e por zonas, para evitar o derrubamento e destrución daquelas estruturas da croa do castro postas ao descuberto en anteriores traballos de escavación arqueolóxica e que presentan un estado de conservación máis deteriorado, polo que precisan urxentemente de actuacións de escavación, consolidación e acondicionamento para a súa conservación e protección, e para facilitar, á súa vez, a accesibilidade e seguridade dos visitantes.

Parque Arqueolóxico da Arte Rupestre (PAAR). Equipamento público situado no concello pontevedrés de Campo Lameiro que conta cun centro de interpretación e cunha área arqueolóxica visitable de case 22 hectáreas, declarada Ben de Interese Cultural, na que existe unha extraordinaria colección de petróglifos que son accesibles a través dunha serie de infraestruturas (itinerarios sinalizados, zonas de descanso, recreación dun poboado da Idade do Bronce etc.). O obxecto da proposta é manter e ampliar os recursos de difusión do PAAR mediante a reparación do poboado da Idade do Bronce, deteriorado polo paso do tempo e polo seu uso, a reconstrución dunha área de necrópole que achegue o visitante ao mundo da morte da Idade do Bronce, e a iluminación dalgúns dos petróglifos para facilitar a súa visita nocturna.

Parque Arqueolóxico da Cultura Castrexa (PACC). Esta infraestrutura museística, situada entre os concellos ourensáns de San Amaro e Punxín, abrangue un centro de interpretación e o xacemento arqueolóxico coñecido como A Cidade de San Cibrao de Las, que é un dos castros escavados mellor coñecidos e con maior monumentalidade de Galicia. A actuación consiste en levar a cabo traballos de escavación e de consolidación arqueolóxica dun barrio do castro para ampliar os recursos turístico-culturais postos ao descuberto, e realizar traballos de restauración e acondicionamento das zonas de tránsito do itinerario de visita ao castro, para mellorar a súa accesibilidade; ademais de completar o peche do ámbito do PACC, ampliar a súa sinalización e crear zonas de esparexemento dos visitantes.

 

Operación cofinanciada pola Unión Europea
Programa Operativo FEDER Galicia 2014-2020
Contribuír á conservación do medio ambiente e do patrimonio cultural
Unha maneira de facer Europa