Ceibe é unha obra de baile e música tradicional que afonda na relación entre os roles de xénero e a nosa tradición. Ceibe traballa sobre o xénero e as súas formas de operar en diferentes ámbitos do día a día, incluíndo unha manifestación cultural tan importante como o baile tradicional. Trátase de entender que é o xénero para nós como individuos, como colectivo e tamén como sociedade.
Bailador é unha peza de danza galega contemporánea baseada nas músicas de Berrogüetto. Trátase dunha obra coreográfica que rende unha profunda homenaxe a unha música que non naceu para ser bailada, onde a danza de raíz galega se mestura con outras linguaxes do movemento para darlle un sentido corporal á música dun grupo que transformou o xeito de facer e de entender o son da nosa terra. Bailador reivindica o papel fundamental da muller galega como preservadora e transmisora da nosa sabedoría popular.
Desprovisto é unha aposta pola plasticidade, o flexible e o cambio. Unha obra que mantén a esencia dos anteriores traballos da compañía: un alto nivel técnico acrobático, intérpretes naturais e unha idea central que move a obra, pero que non é imprescindible coñecer para gozar do espectáculo. Ao mesmo tempo, a compañía mergúllase nun novo camiño, pasando do ríxido ao flexible e incorporando tecidos á investigación acrobática e á danza como recurso.
Cando cae a noite e entra a melodía, acéndense as luces para min.
Blues de Medianoite entra, a ritmo de blues, no misterio e a sensualidade da noite, achegándonos ás raíces negras no movemento, na música e nos instintos. A chamada da terra que pon en valor ás grandes mulleres do blues e a riqueza rítmica que ven directamente de África, sempre dende un filtro persoal. Isto é, o MEU blues.
BERRO
É a liberdade de contar sen medo nin ataduras,deixando fluír a inocencia da natureza, a forza ineludible da expresión. A voz interior chama por manifestarse, voar, fóra de nós. É un fío condutor entre o noso interior e o exterior. Baleirarse polo Berro, seguindo pasos ancestrais que veñen sós porque os levamos dentro, dende a orixe. Non escoitar esta voz, non expresala é encerrar corpo e alma. Unha parálise existencial.
BAILAR AGORA é unha sorte de imperativo cara a un posicionamiento no presente, social e persoal, a través da danza. Un impulso por situarnos no tempo actual das cousas, con plena consciencia sobre o que estamos a facer e cómo estamos a vivir o aquí e o agora. A proposta sobre como facelo é clara: Bailando.
Nina, valente e alegre a partes iguais, atopa unhas flores moi especiais que a levan a descubrir un mundo fantástico, habitado por seres máxicos, poderosos e divertidos. Todo é tan diferente, tan brillante, tan fermoso! Mais Nina sinte a falta do seu fogar e decide marchar. A cuestíon é que ese mundo é un labirinto e como todos os labirintos, é moi doado entrar pero ben complicado sair. Será quen de conseguilo?
Nina Ninette é un conto iniciático que se inspira na estética do Ballet Triádico celebrando o centenario da súa estrea, para danzar unha historia de beleza e rebeldía.
"O que non se ve" representa a través da danza a forza e a loita da muller na sociedade actual. Unha mestura de danza tradicional e comtemporánea, que pretende mostrar o que existe debaixo das vestimentas tradicionais e no interior das mulleres do noso país. Con esta obra, imos un paso máis alá (Et Suseia), para conxugar estilos moi diferentes, pero á vez moito en común. Aportamos tamén unha nova sonoridade nas melodías que acompañan o espectáculo, e mergullándonos na percusión tradicional pero enfocándoa cara un aspecto máis actual.
The Great Greta é un espectáculo multidisciplinar que combina danza, humor e circo para levar á escena unha personaxe divertida. Viaxa no seu mini coche relatando fases da súa vida e imaxinando as que virán. Quén é Greta?.
Dende unha perspectiva dramatúrxica de danza con componentes de comicidad, Greta sumérxenos no seu peculiar universo. Partindo do seu corpo actual, trasládanos á súa infancia deportiva, para continuar co seu atrevido paso no mundo da arte e rematar reflexionando sobre a súa identidade. Cantas Gretas hai? Cal queres que sexa?
No noso día a día creamos lugares onde sentirnos seguros, tranquilos e arroupados. Temos unha idea preconcebida desta "zona de confort" como un refuxio inalterable, onde nada nin ninguén pode entrar. Sen embargo, a realidade é outra. A enerxía das persoas pode influir neste lugar alterándoo de diversas formas. En Qualia exploramos esta inestabilidade dende o noso lado máis humano. O escenario convértese nun campo de batalla e, no seu centro, un lugar iluminado onde atopar esas sensacións que tanto anhelamos.
