A sexta edición de Cultura no Camiño desenvolverase do 16 de abril ao 30 de setembro nun total de 103 concellos situados nas diferentes rutas xacobeas de Galicia.
O programa xurdido ao abeiro da conmemoración do VIII Centenario da Peregrinación de San Francisco de Asís a Compostela desprega unha carteleira de 342 actuacións escénicas e musicais, protagonizadas por 146 formacións artísticas galegas. Artículase como un circuíto de espectáculos que ademais de contribuír á descentralización da oferta cultural, amplía as posibilidades de distribución do teatro, a música, a danza, a maxia e o novo circo producidos de maneira profesional na nosa Comunidade.
Escenas na noite é unha proposta cultural pensada para transformar un espazo ao aire libre nun lugar de encontro arredor das historias e da emoción compartida. Ao caer a noite, o público reúnese para gozar dunha velada escénica baixo o ceo aberto, onde a imaxinación e a atmosfera nocturna crean un ambiente especial.
LEVAINO! exhórtanos a facer unha viaxe pouco coñecida que parte do Mediterráneo Oriental e remata en Galicia, presentado os vínculos que unen ambas tradicións orais.
Xurxo Fernandes, investigador de ambas culturas e a través dunha sonoridade sorprendente, mergúllanos nunha paisaxe sonora que envolve os arcaicos sons da Galicia máis primitiva co máis suxerente exotismo oriental.
Non sempre é fácil encaixar. É o primeiro día na fábrica, unha vella factoría que acaba de herdar do seu avó e que xa viviu épocas mellores. Coa ilusión do primeiro comeza a súa xornada, pero pronto se dá de conta que as instalacións necesitan algo máis que uns amaños.
A maquinaria oxidada, os engrenaxes desaxustados, as estruturas inestábeis, convértense no escenario perfecto para un sinfín de torpezas e inesperadas habilidades.
Nun mundo dominado polas máquinas a arte do circo emerxe como unha forma de rebelión e liberdade.
Hoxe é o día. Hoxe ela organizou unha gran festa para celebrar a vida, e onde facer realidade os seus … “soños pendentes por cumprir". Temos todo preparado, un triángulo por espazo de xogo, soños que soben, baixan e flotan no aire, temos un DJ, os temazos musicais da nosa vida, circo, ganas e moita actitude. Hoxe é o día de non deixalo para mañá.
Unha proposta desenfadada ambientada nos 80, unha invitación a xogar, a gozar, a soltarnos por un día, a vivir celebrando o momento presente.
Joshua Kenneth é un artista internacional de orixe galega que viaxa por todo o mundo realizando actuacións de maxia. A súa maxia foi galardoada en importantes competicións de Portugal, España e Italia, gañando un premio FISM en Turín como segundo mellor mago de toda Europa.
En 2023 gañou en Madrid o Premio Frakson, un prestixioso galardón que cada ano se outorga ao mellor ilusionista de escena do Estado español. Obtivo o premio cun número chamado O soño do avaro onde consegue que as pompas de xabón se convertan en moedas e billetes.
Pódese facer música cunha vasoira? Cunha escaleira ou cunha barreira de obra? Pódese! E vaia que si!
A silva é un arbusto espiñento e gabeador que ocupa terreos abandonados e forma valados que coidan con fervor as heredades.
Ao seu abeiro créase un hábitat moi singular e unha terra fértil ideal para o cultivo. Resulta paradóxico que unha planta que produce tanta aversión regale uns froitos tan exuberantes e deliciosos... As amoras.
The Beatles, Simon & Garfunkel, Creedence, Joe Cocker, etc... Unha selección moi rítmica, que sona como un canón e consegue que a xente baile e cante creando un ambiente divertido e alegre.
Unha revolución, a xeito de concatenación de trasnadas sorprendentes, para facernos pensar e rir, coas que mudar a realidade.
Entrade a unha enchente de maxia dentro dunha xolda de divertimentos.
Un feixe de chistes visuais estrafalarios para facer aparecer facianas relucentes de ledicia.
Unha malleira de enredos para a celebración desta esmorga de sorpresas, que precisan do comportamento excéntrico e coordinado de toda a concorrencia, para imprimir unha doce revolución da actualidade.
Todos e todas coñecemos a popular historia que aconteceu hai moito tempo na vila alemá de Hamelin, na que un frautista secuestrou os nenos e nenas da vila en castigo por un engano. Segundo nos contaron sempre, os rapaces e rapazas da vila seguiron o músico hipnotizados/as polo doce son da súa frauta. Así foi como sempre nola contaron, pero... Todos os nenos e nenas foron detrás do frautista? Non. Unha nena non sucumbiu ante a música e logrou salvar as crianzas da vila. Que facía tan especial a esta nena? Que era xorda.
