A sexta edición de Cultura no Camiño desenvolverase do 16 de abril ao 30 de setembro nun total de 103 concellos situados nas diferentes rutas xacobeas de Galicia.
O programa xurdido ao abeiro da conmemoración do VIII Centenario da Peregrinación de San Francisco de Asís a Compostela desprega unha carteleira de 342 actuacións escénicas e musicais, protagonizadas por 146 formacións artísticas galegas. Artículase como un circuíto de espectáculos que ademais de contribuír á descentralización da oferta cultural, amplía as posibilidades de distribución do teatro, a música, a danza, a maxia e o novo circo producidos de maneira profesional na nosa Comunidade.
Leti da Taberna trae o seu primeiro monólogo no que explora en ton irónico a nosa relación coas redes sociais e como nos inflúen no noso día a día. En galego e con perspectiva feminista, Enredada enche o escenario de luz e enerxía, provocando que o público se vexa identificado coas situacións que se presentan e acabe ríndose de si mesmo.
Ver este espectáculo vai ser o teu mellor post da semana.
TAL VEZ sexa un espectáculo que che leve a compartir un bo intre cunha muller segura da súa indecisión.
Ao mellor só se trata dun show cheo de acrobacias, equilibrios e malabares, aínda que poida conter trazas de humor serio e estupidez coherente.
Quizais atopemos unha contorsionista retorcidamente divertida. Pode ser que estea soa e pode ser que ás veces acompañada… Por ti?
Sen dúbida, un espectáculo sofisticado, intelixente e innovador, ou non! Só TAL VEZ.
A búsqueda dun espazo onde sentirse a gusto, un lugar onde atoparse. Un camiño onde desprenderse do pasado, onde as falsas necesidades se acumulan coa dificultade de poñerlles nome, sen posibilidade de revisión.
Este pallaso, torpe e caótico presenta a través da danza, a manipulación de obxectos e a acrobacia aérea a posibilidade de transformar ese lastre e usalo para medrar.
Navegará xunto ás espectadoras e os músicos por un mar de emocións, soltando amarras onde as debilidades se tornan fortalezas.
En Historias dun mundo grande a cadeliña Becki, desde a súa biblioteca onde pasa tanto tempo lendo e escribindo, cóntanos historias que foi coñecendo nas súas viaxes polo mundo. Historias de colaboración e de solidariedade entre as persoas. E con ela cantamos e bailamos para celebrar o respecto e a felicidade.
Un home que xoga como un neno atrapado nos medos dun adulto, unha muller que fai o imposible por ser fiel á nena que leva dentro e un terceiro que non dubida en mostrar o seu neno para chegar aos non tan nenos.
Tres pallasos, tres exóticas cores en busca de si mesmas coa intención de partillar a súa arte, inxenio e tenrura.
Gandaina é un espectáculo de rua para todas as idades que combina teatro xestual, danza, acrobacia, malabares e moita moita improvisación.
O Bloco Afro é un dos espectáculos de rúa máis soados de Trópico de Grelos. Caracterízase por ritmos moi festivos e contundentes de Salvador de Bahía, adornados ademais con diversas coreografías. A frescura destes ritmos xunto coa actitude e destreza desta banda de percusionistas e a potente presencia da raíz africana, fan deste desfile musical unha auténtica festa que non deixará a ninguén indiferente.
Gramola Yé,Yé é un cuarteto formado por guitarra, baixo, batería e voz cunha línea moi fresca e festiva. Renden homenaxe aos guateques, ao movemento Yé Yé e ás cancións do verán dos anos 60 e 70.
O seu repertorio está integrado por cancións de los Diablos, Los Bravos, Karina, Massiel, El Dúo Dinámico... Recordando temas como Las flechas del amor, Un rayo de sol, Oh,Oh, July, El bául de los recuerdos ou o clásico La,La,La.
Rogelio é un entrañable personaxe de ficción e esta é a última entrega dunha triloxía. Que pasaría se ninguén viñera ao teu aniversario? Se ninguén cantara os parabéns para ti? Rogelio volve estar só e desta vez no seu día máis especial. Queres acompañalo? Un espectáculo de risas para toda a familia no que o actor Dani Blanco dá continuidade á saga do pallaso Rogelio. Circo, clown, corda frouxa, malabares, música e sobre todo moito humor.
Un fotógrafo ambulante de hai máis dun século, unha vella cámara de fol, maletas cheas de segredos e un oficio que hoxe soa case a maxia. Durante o que podería ser un día calquera de traballo, este personaxe tenta exercer a súa profesión: preparar a cámara, buscar a luz perfecta, ordenar os seus improvisados modelos e capturar instantes únicos. Pero os obxectos cobran vida, as imaxes rebélanse, o tempo estírase e dóbrase, e cada fotografía convértese nunha pequena aventura.
Uxía lambona e a Banda Molona é unha banda musical infantil que nace no ano 2014 e está formada por Pali ao baixo, Ñoc á batería, Diego á gaita e frauta, Serghaño á guitarra, Roscón ao acordeón e Uxía cantando e animando!
Ten o obxectivo de facer cantar e bailar “coma toliñ@s” a todos os nenos e nenas, achegándolles a música tradicional galega dun xeito atractivo para eles, cambiando estilos musicáis, letras…, e temas propios sempre en galego.
A día de hoxe teñen tres cd´s publicados:
Uxía Lambona e a Banda Molona 2015
