A sexta edición de Cultura no Camiño desenvolverase do 16 de abril ao 30 de setembro nun total de 103 concellos situados nas diferentes rutas xacobeas de Galicia.
O programa xurdido ao abeiro da conmemoración do VIII Centenario da Peregrinación de San Francisco de Asís a Compostela desprega unha carteleira de 342 actuacións escénicas e musicais, protagonizadas por 146 formacións artísticas galegas. Artículase como un circuíto de espectáculos que ademais de contribuír á descentralización da oferta cultural, amplía as posibilidades de distribución do teatro, a música, a danza, a maxia e o novo circo producidos de maneira profesional na nosa Comunidade.
O Bloco Afro é un dos espectáculos de rúa máis soados de Trópico de Grelos. Caracterízase por ritmos moi festivos e contundentes de Salvador de Bahía, adornados ademais con diversas coreografías. A frescura destes ritmos xunto coa actitude e destreza desta banda de percusionistas e a potente presencia da raíz africana, fan deste desfile musical unha auténtica festa que non deixará a ninguén indiferente.
Gramola Yé,Yé é un cuarteto formado por guitarra, baixo, batería e voz cunha línea moi fresca e festiva. Renden homenaxe aos guateques, ao movemento Yé Yé e ás cancións do verán dos anos 60 e 70.
O seu repertorio está integrado por cancións de los Diablos, Los Bravos, Karina, Massiel, El Dúo Dinámico... Recordando temas como Las flechas del amor, Un rayo de sol, Oh,Oh, July, El bául de los recuerdos ou o clásico La,La,La.
Rogelio é un entrañable personaxe de ficción e esta é a última entrega dunha triloxía. Que pasaría se ninguén viñera ao teu aniversario? Se ninguén cantara os parabéns para ti? Rogelio volve estar só e desta vez no seu día máis especial. Queres acompañalo? Un espectáculo de risas para toda a familia no que o actor Dani Blanco dá continuidade á saga do pallaso Rogelio. Circo, clown, corda frouxa, malabares, música e sobre todo moito humor.
Un fotógrafo ambulante de hai máis dun século, unha vella cámara de fol, maletas cheas de segredos e un oficio que hoxe soa case a maxia. Durante o que podería ser un día calquera de traballo, este personaxe tenta exercer a súa profesión: preparar a cámara, buscar a luz perfecta, ordenar os seus improvisados modelos e capturar instantes únicos. Pero os obxectos cobran vida, as imaxes rebélanse, o tempo estírase e dóbrase, e cada fotografía convértese nunha pequena aventura.
Uxía lambona e a Banda Molona é unha banda musical infantil que nace no ano 2014 e está formada por Pali ao baixo, Ñoc á batería, Diego á gaita e frauta, Serghaño á guitarra, Roscón ao acordeón e Uxía cantando e animando!
Ten o obxectivo de facer cantar e bailar “coma toliñ@s” a todos os nenos e nenas, achegándolles a música tradicional galega dun xeito atractivo para eles, cambiando estilos musicáis, letras…, e temas propios sempre en galego.
A día de hoxe teñen tres cd´s publicados:
Uxía Lambona e a Banda Molona 2015
O pallaso Lolo, fará as delicias da rapazada e sorprenderá as persoas adultas, facendo figuras imposibles con globos e gags divertidos. Un espectáculo dende unha perspectiva cómica e interactiva onde o público se sentirá parte integrante da diversión.
Escacharrante e para toda a familia, cunha posta en escena onde a ilusión do clown mestúrase nun cóctel de risas e gargalladas.
Radio Bulebule é un espectáculo baseado no libro-cd-dvd Radio Bulebule editado por Kalandraka Editora, no que se combinan cancións e interpretacións cos rexistros máis divertidos.
Abre as orellas! Sintoniza Radio Bulebule, a radio itinerante, radio ambulante, radio cantante, transmitindo para o mundo en linguaxe universal. Irrompe no dial a emisora que soñamos. A emisora que máis nos gusta. Porque dentro dela soa o universo todo, porque dentro dela todo o universo é música.
'Pakolas', rockeiro e guitarreiro, é o nome co que Paco Cerdeira se presenta ante o público infantil, eido no que o músico conta con longa traxectoria. Neste concerto, Pakolas guiaranos coa súa forza interpretativa e o seu humor por todo un universo musical, a través da súa voz e a guitarra, nun espectáculo individual creado polo propio autor, onde a interacción e participación coas nenas e nenos, a animación, as súas caracterizacións e a súa música son o principal atractivo para o público. Pakolas tamén nos presentará a súa máquina do tempo no directo
Tulis, a contadora aventureira, acompáñanos na historia de Lía, unha nena valente que emprende unha viaxe chea de emocións, aventuras e descubrimentos. A través do conto, o público infantil conecta con valores como a amizade, a autoestima, o respecto pola identidade ou a importancia de confiar nunha mesma. Todo isto acompañado de música para reflexionar, emocionarse… e bailar!
Cristian Leggiero: creador da historia e compositor das cancións da mesma
Paty Lesta – Tulis, a contadora aventureira: cantante e narradora.
Recomendado de 3 a 8 anos
Ilusionismo para disfrutar toda a familia, con números sorprendentes, o humor e a participación dos pequen@s e maiores están garantizados en todo momento. Preparados para entrar nunha experiencia inolvidable? Vén ilusionarte.
