Cultura no Camiño

Brassica Rapa é un grupo de música popular nacido a finais do 2017 buscando darlle unha volta ao concepto de charanga. Formado íntegramente por mulleres, tocando instrumentos de vento metal e percusión crean unha atmosfera alegre coa súa música, de repertorio coñecido e fresco, coa que a festa está asegurada. Dúas trompetas, dous trombóns, un saxo alto, unha tuba, unha caixa e un bombo compoñen o seu persoal, que pretende reivindicar a presencia da muller neste tipo de agrupacións a través da troula.

Con máis de 20 anos no mundo do circo, Raquel e Girisho presentan o seu quinto espectáculo de circo contemporáneo.
Dous eminentes artistas de circo esfórzanse por demostrar quen é o mellor artista. Girisho ten confianza, é entusiasta pero non moi intelixente. Raquel é estrita, metódica e moi hábil. Non se deterán ante nada para gañarse a aprobación do seu público. 
Un espectáculo de circo áxil, divertido e moi habilidoso, no que Raquel e Girisho usan o trapecio, tea aérea, Hula hoops e ...moito máis.

Tres bañistas despistados, percorren as rúas buscando espazos con auga: fontes, charcas, pilóns... Despregarán os elementos necesarios para pasar unha tarde divertida xunto a auga.

Unha animación de rúa en pequeno formato pero moi dinámica e divertida. Os personaxes interactúan con calqueira dos elementos da rúa e da xente, de xeito que a improvisación e a estética clown é o fío condutor deste espectáculo.

Unha obra máxica con ilusións con moito aquel, nun acto escénico máis portentoso que atopar un programa cultural en Tele5.
Espectáculo de ilusionismo, risadas  e participación da concorrencia, nunha enleada de enredos ben xeitosa!.

Trepas é o alcume dun habitante de Vilatriste enredado inesperadamente nunha singular aventura: salvar á vila das fauces dun malvado dirixente. Xunto a unha inusual superheroína descobren a fórmula para vencer ao seu inimigo pero... funcionará? 

De Vilatriste a Vilalegre é unha divertidísima creación de Teatro ó Cubo con monicreques e actores, para pequenas e maiores e en coprodución co Centro Dramático Galego no seu 40 aniversario.

O público achégase o mundo dos automatismos a través de visitas guiadas teatralizadas de nove pezas artesás, desfrutando da escena e historia que os seus creadores narran ao carón de cada elemento da serie que conforma KINETIKO.

Unha combinación de xogo, arte e técnica.

Personaxes musicais que a partires de mecanismos crean sons e ritmos. Historias e contos que nacen do movemento dunha manivela. Efectos especiais utilizados tradicionalmente na escena teatral ou no cine. Un teatriño de guiñol automatizado homenaxeando ao tradicional títere de cachiporra.

O peculiar universo desta muller-nena que anda solta polas rúas, fai de cada praza un novo xogo cada día. Xunto con todo o que a rodea, sucéndese momentos de risas inesquecibles a través da súa interacción co público e cos transeúntes que paran a ver as tolerías que lles ofrece esta gran pallasa.

Pajarito é a número un, a número dous e tamén ... é patrimonio da humanidade, a oitava marabilla do mundo!!!!!

O seu amplo e variado repertorio está composto por versións de diferentes épocas e estilos como son o pop español, rumba, latino, folk, irlandés, música galega, versións de música disco dos 80 con violín, etc.

Temas de Los Rodríguez, grupos galegos, Heredeiros, Caimán, Os Vacalouras, Loquillo, Joaquín Sabina, McLan, Melendi, Secretos, Fito y Fitipaldis, Estopa, Revolver, e un amplo etc., conforman un repertorio para todos os públicos de temas dos 80, 90 e actuais para todas as idades.

Maricarme é o resultado de xuntar tres recoñecidas caras do panorama musical galego: Antía Ameixeiras (Caamaño&Ameixeiras), Cibrán Seixo (Davide Salvado, Budiño) e Migui Carballido (Zeltia Irevire). Os instrumentos acústicos (violíns, pandeiros, bouzouki...) únense á sonoridades máis electrónicas (sintetizador de baixo, pads, pedais...) creando un folk orixinal e poderoso. Maricarme viaxa dende a tradición oral ás composicións propias e presenta un concerto dinámico no que prometen facervos bailar.

Espectáculo de danza-circo 360º de medio formato, onde dous personaxes crean mundos de fantasía.

 Xogo e imaxinación, acrobacia aérea e voz cantada en directo, son os ingredientes dun espectáculo onde a maxia xorde do uso creativo dos elementos e a destreza comunicativa das interpretes co espectador.