Cultura no Camiño

Unha experiencia explosiva e ardente de acción sen pausas! Circo de lume está deseñado para captar toda a túa atención, darche calor e deixarche hipnotizado. Este show ofrece unha infinidade de números vibrantes que fusionan danza, malabares, pirotecnia, conexión próxima co público e unha faísca de humor impredicible. Cada acto brilla con efectos visuais asombrosos elevando a técnica de manipulación con lume á súa máxima expresión. Un show que leva a arte de lume a novas alturas e que desafía os límites do posible.

Este espectáculo conta, en clave de traxicomedia, a historia dun antigo circo do século pasado, o Circo Cambuche.

Kike Castro, o derradeiro supervivente deste circo, lembra a historia da súa familia de funambulistas e o seu amargo final. Cada domingo pola tarde, visita a vella carpa da familia e fantasea coa lembranza do circo, tenta subir ao arame, como cando era neno, pero agora non se atreve.

Este é o primeiro espectáculo no que Peter Punk comeza a súa andaina como pallaso. E no que se perfila a súa personalidade divertida e irreverente, que fará as delicias d@s cativ@s e tamén dos maiores, creando un universo propio no que a linea de traballo é a diversión, o xogo e unha visión do mundo moi persoal.

Mostrará a súa destreza (ou non) con elementos que van aparecendo da súa maleta: pelotas, un prato chinés, fachos de lume e o clásico tartazo reinventado ao máis puro estilo deste irreverente pallaso internacional.

Un charlatán chega á vila coa súa lingua afiada, os seus instrumentos afinados e seu posto de venda ateigado de remedios para todos os males.

Armado de retranca e coa sabedoría que dá percorrer todos os camiños, será quen de vender ao público menciñas que non necesitan a prezos que non poden pagar, cun catálogo infinito de solucións inútiles para problemas inexistentes, laretadas baleiras, melodías inventadas, pequenas grandes ilusións e contos de impostor. Porque o noso protagonista sabe sempre o que a xente quere escoitar.

Un pasarrúas de danza e cabaré inspirado nos areais de principios do século XX, a ritmo de swing e manouche, cun vestiario e atrezzo que nos levan directamente á Biarritz, á Marsella, á Donostia dos anos 20.

Carapuchiña e os cinco lobiños é un espectáculo de narración oral e música onde a grande protagonista é unha Carapuchiña Vermella que vive unha aventura un pouco diferente. No seu camiño, a falta dun lobo, hai cinco lobiños que son tan pequerrechiños que caben na súa cesta.

A combinación da narración de Ángeles Goás e a música de Cristina Castro crea un ambiente no que os máis pequechos e pequechas da casa estarán entretidas e gozarán coa familia.

Pedras de cartón presenta Carapuchiña, o quinto espectáculo da compañía, no que traballa cun dos clásicos máis populares da literatura infantil. Carapuchiña é un conto de fadas de transmisión oral, adaptado posteriormente por Charles Perrault e máis tarde polos irmáns Grimm. Pedras de cartón toma como punto de partida o clásico para xogar cos contos populares.

Canta, Buguina, canta! Canta para nenos e nenas, para viaxar xuntas en igualdade, con amor e respecto. Soprando a nosa buguina, comezaremos a viaxe polo mar. Visitaremos illas onde viven caracois, galiñas poñedoras e vacas. Regaremos a herba. Xogaremos coa marea que sobe e baixa. Cantaremos cancións sobre a lúa e faremos barcos de papel para continuar viaxando lonxe. Brincamos coa imaxinación recreando animais con obxectos, barcos e illas de papel, un mar de tea ao son da música e as palabras.

Canta connosco! é un espectáculo baseado no libro-disco-DVD do mesmo nome editado por Kalandraka.

Nel combínanse cancións gravadas por unha banda de pulgas con sktechs onde se tratan temas como a lectura e os xogos tradicionais e colectivos fronte ao exceso de TV e de videoxogos; o consumismo na compra de xoguetes; a relación entre os avós e os netos; o fomento do galego etc. 

Elenco artístico 

Antón : Carlos Yus
Rosiña e Cachirula: María Campos

Houbo unha vez un lobo feroz e unha nena asustada. Houbo tamén unha avoa indefensa e unha madrastra malvada… Sempre a mesma leria… ou non? Aquí, dámoslle a volta! Ven cambiar o conto connosco!

Concerto-contacontos no que se traballan os estereotipos de xénero a partir de contos tradicionais, adaptándoos e creando novos relatos cunha perspectiva non sexista. Descubriremos as verdadeiras historias da Carapuchiña e da pequena Serea, onde elas son as protagonistas que deciden o seu destino, con novos personaxes como o Pirata Efrén e a Avoa Lola.