A sexta edición de Cultura no Camiño desenvolverase do 16 de abril ao 30 de setembro nun total de 103 concellos situados nas diferentes rutas xacobeas de Galicia.
O programa xurdido ao abeiro da conmemoración do VIII Centenario da Peregrinación de San Francisco de Asís a Compostela desprega unha carteleira de 342 actuacións escénicas e musicais, protagonizadas por 146 formacións artísticas galegas. Artículase como un circuíto de espectáculos que ademais de contribuír á descentralización da oferta cultural, amplía as posibilidades de distribución do teatro, a música, a danza, a maxia e o novo circo producidos de maneira profesional na nosa Comunidade.
Monoulious DOP continúa co seu Chándal Metal Tour, para seguir percorrendo en 2026 os escenarios do país e parte do estranxeiro co seu humor e estilo inconfundible.
A xira arrincou co lanzamento de novos temas baixo a produción de Iago Pico (Tanxugueiras, Rozalén, Rayden…) cunha estética retroactual, influenciada por unha época de gran valor musical e persoal para a banda, os anos 2000.
O repertorio do grupo componse de popurrís ou sets de temas instrumentais orixinais tomados da tradición galega, con especial atención aos gaiteiros e músicos do interior. A principal fonte é o traballo de campo do Arquivo Castro Vicente (Cástor e Félix Castro), e os seus fondos documentais e sonoros, centrados sobre todo na frauta de madeira e acordeón diatónico, así como en estilos de toque de gaita de comarcas pouco coñecidas como A Limia, Frieiras, e Navia entre outras.
Odaiko ofrécenos un crisol de ideas musicais onde os ritmos de culturas alleas como o latin, o flamenco, o brasileiro ou o africano se mesturan coas innovacións técnicas percusivas e o folklore galego para representar un pasado que dá resposta ao noso presente. Conceptos como labrego, folclore, emigración, industrialización, etc., están presentes ao longo do show nunha viaxe músico-percusiva tratada dun xeito vangardista.
Robert Pier é un músico coruñés que comeza a súa andaina a moi temperá idade, en bandas de diferentes estilos como pop, rock ou reggae. A súa curiosidade pola diversidade de estilos e polas músicas de raíz achéganlle, sobre todo, á guitarra flamenca e ao jazz manouche, estilos que, xunto coa rumba, son as súas grandes influencias á hora de abordar as súas composicións.
Formada por músicos xa rodados, e maiormente influenciados polo grunge e o rock dos noventa, Exeria únese pouco despois da pandemia, que obrigou a deter calquera iniciativa musical.
Unha nova andaina musical cargada de volume que, en 2022, empezou a tocar por Galicia e que despois da presentación do seu primeiro sinxelo, ‘Un novo nome’, incrementou a súa presenza nos escenarios.
En permanente estado de creación e cun estilo musical propio, a medio camiño entre o Rock, o Pop e a Canción de Autor; con letras agudas e sinceras, cargadas de ironía, Pablo Vila transmite unha visión crítica e vitalista da vida, con temas sociais e humanos, sen perder o carácter íntimo e persoal.
O grupo de gaitas Os Barrios é unha formación musical fundada en 1894 por José Argiz na parroquia de Muradelle, Chantada. É considerada a banda de gaitas máis antiga de Galicia en activo. Ao longo da súa historia mantiveron viva a tradición musical galega, participando en numerosas foliadas, romarías e eventos culturais. Grazas a súa extensa traxectoria, conta cun amplo repertorio propio.
Catro mulleres: Lorena Reinaldo, Paula Oanes, Josefa Fernández e Elena Paz. Elas forman este insólito cuarteto feminino onde o protagonismo das arpas e o son doce das súas voces dan vida a un estilo propio e único, chamado Lulavai.
Coñécense no 2005 cando formaban parte da orquestra Folc Sondeseu, baixo a dirección do arpista e ex-compoñente de Milladoiro, Rodrigo Romaní.
Claudia Abril (voz e percusións) Marina Carpente (violín e voz) e Hugo Abril (Guitarra clásica) integran este proxecto no que melodías tradicionais galegas e ibéricas son adaptadas a sonoridades actuais con certa intimidade, personalidade e frescura. Abril é unha proposta de folk contemporáneo na que instrumentos de música tradicional como a pandeireta, o pandeiro ou o violín folk dan lugar a un coidadísimo repertorio que contribúe a poñer en valor a música tradicional galega sen deixar de lado a modernidade. Abril é tradición renovada; sons de raíz en harmonía co presente.
A Raia Seca é o territorio que se extende aos dous lados da liña que separa Galiza e Portugal, xa lonxe do Miño. Quilómetros de fronteira que se estende no espazo e no tempo, e na que se desfiguran os límites da realidade até case o distópico: Vías clandestinas de contrabando e extraperlo. Salvo-conduto para guerrilleiros e escapados. Estados sen lei e camiños co privilexio de facer invisibeis a quenes os transitan. Pobos promiscuos nos que todo cambia segundo por que porta se entre ou se saia.
