Teatro

CHAFALLAS vai de pobo en pobo buscándose a vida, conta historias e entretén a xente en troco de comida ou algo de diñeiro. Sabe facer de todo, ás veces sáelle ben, outras... non tan ben, pero o que si fai é poñerlle moi boa intención. É nómade, vai coa súa casiña ás costas e coma un caracol, leva historias enroscadas. Entende o idioma dos animais, é unha sabia da natureza e sen sabelo, a primeira muller narradora que vive do seu oficio. As noites sen teito non son fáciles; e pra pasalas, enreda coas palabras e a música ata durmir paseniño e que o fermoso son da alborada a desperte.

Visitas guiadas teatralizadas de nove pezas automátas artesás.

O público achégase o mundo dos automatismos, desfrutando da escena e historia que os seus creadores narran ao carón de cada elemento da serie que conforma KINETIKO.

Unha combinación de xogo, arte e técnica.

Personaxes musicais que a partires de mecanismos crean sons e ritmos Historias e contos que nacen do movemento dunha manivela Efectos especiais utilizados tradicionalmente na escena teatral ou no cine Un teatriño de guiñol automatizado homenaxeando ao tradicional títere de cachiporra

Dúas neuronas organizan unha Xunta Extraordinaria Neuronal para analizar o estado da materia gris galaica e estimular novas conexións galaico-simpáticas.
Cada punto da orde do día levará ás neuronas asistentes a percorrer lugares comúns do consciente colectivo, no que a versión galega sempre é moito mellor.
Porque ser galego é un estado mental.
Neste novo espectáculo, Lucía Veiga e Marita Martínez exploran as realidades do galego valéndose do humor e de técnicas de improvisación.

Bernarda é unha historia próxima, comprensible e universal. Todos coñecemos no noso entorno a alguén como Bernarda, e todos temos un pouco de Bernarda no noso interior, porque ese choque xeracional entre pais e fillos é unha constante universal, e dependendo de que lado esteamos vemos a realidade de forma totalmente diferente. Cando somos fillos queremos rachar coas normas que nos impoñen, e cando somos pais vémonos na obriga de ser nós os que as impoñamos, polo seu ben, e ese choque entre xeracións que conviven na mesma casa é inevitable.

Logo da chegada do home á lúa á humanidade só lle faltaba un reto: a chegada do home a Galicia. No ano 2010 (ano 25 despois de Gayoso), dous intrépidos exploradores tiveron o valor de adentrarse nas descoñecidas terras galaicas a través da ruta xacobea.

"GO ON!" recopila esta experiencia límite que deixa aos do "Al filo de lo imposible" como simples boyscouts.

"GO ON!" é unha emocionante novela de aventuras na que os seus protagonistas viven situación extremas como o terrible ataque do despiadado can de palleiro ou a entrevista a un porco no corredor da morte.

Elba é unha nena detective. Vese obrigada a viaxar no tempo para evitar que destrúan a Torre de Hércules. Unha historia divertida e dinámica onde os nenos gozarán axudando a Elba na súa investigación, ao mesmo tempo que aprenderán datos curiosos sobre a Torre de Hércules. Ademais coñecerán da man dalgún dos personaxes a lenda de Hércules e Xerión

Elías ten medo de todo. Vive con tanto medo... que o seu medo convértese nunha pantasma chamada Asustón. Para afrontar os seus medos e desfacerse de Asustón, debe emprender unha viaxe por todo o mundo para abrir a súa mente e deixar de ter medo Cancións, bailes, poemas, xogos, maxia, sorpresas... Quen dixo que afrontar os teus medos non fose divertido?

Píscore Teatro ofrece a posibilidade de disfrutar, desde o teatro, da música da época barroca, nunproxecto teatral que vén asentado sobre o ton cómico, apartado do academicismo, que inundará todo o espectáculo.

Mantendo a anterior e exitosa líña de traballo marcada pola compañía, nesta produción (con)fusionamos música, teatro, humor, comedia xestual, clown e participación do público. Cunha marimba como eixo principal do espectáculo, Concerto con Fusión incorpora diversos matices musicais, cunha vocación popular e con cabida para diferentes ritmos: música latina, rock & roll, reggae, pop ou música disco.

Nun contexto humorístico e divertido, a raposa e o lobo vense envoltos nun conflicto pola propiedade dunha pereira con sete peras, á que misteriosamente lle van desaparecendo as peras unha a unha. No texto vense cuestionados os roles habituais que teñen a raposa e o lobo nas cultura galega de tradición oral; os dous vólvense vexetarianos, son rexeitados polos seus grupos habituais de compañía e acaban sendo compañeiros a causa do amor pola Pereira coas sete peras.