Proxección audiovisual

Na cidade de Sapporo, Iori, unha cativa de sete anos, camiña triste polo carreiro do río. Cando está a piques de caer nel, Yuichi sálvaa e lévaa ao seu apartamento, onde sabe que é unha orfa que vive miserablemente traballando para a familia Naba, unha das máis ricas da cidade. Contra o xuízo de todos, menos do seu mellor amigo, Daisuke, decide criala el mesmo. Dez anos máis tarde, Yuko, a filla máis vella da familia Naba, visítaos. A súa morte en estrañas circunstancias converte en sospeitosa a Iori.

Imaxe ©1985 Toho Co., Ltd.

Tetsuro Muraki espera unha prostituta no seu cuarto de hotel. A súa pequena empresa editorial entrou en bancarrota, a yakuza atacou a súa muller e el ten a intención de morrer e de levar consigo a vida da súa acompañante. Esta pequena obra mestra, na que Shinji Sōmai fai a súa particular e melancólica incursión no roman porno da Nikkatsu, móstranos entre os neóns da cidade o encontro entre un home e unha muller que tentan construír unha nova vida á vez que seguen atrapados no seu pasado.

*Non recomendada para menores de 18 anos (contido erótico).

Tomando como pretexto filmacións domésticas que parecen rodadas por un avogado nun lago de Normandía e as orixes e pantasmas creadas polo invento do cinema, José Luis Guerin elabora un dos achegamentos máis fascinantes aos retos tradición-ruptura na arte contemporánea. Reconstrución, fake, metraxe recuperada ou atopada, un tránsito polas vías plausibles e as principais achegas no panorama da creación.

Para a súa primeira longametraxe, Shinji Sōmai adaptou o manga de Kimio Yanagisawa, mostrou as súas características longas tomas e o seu interese polas historias de mozos achegándose á idade adulta. Yūsuke Tashiro, seguindo os seus soños de converterse nun avogado, e orixinario de Kyūshū, matricúlase nun prestixioso instituto de Toquio. Debido a un erro da axencia inmobiliaria, termina convivindo coa moza máis guapa da súa escola, Kei Yamaha. Yūsuke sempre terá que estar alerta por se o segredo de que viven xuntos sae á luz.

Imaxe ©1980 Toho Co., Ltd.

O pasado decembro, Fanzine Fest celebrou a todo tren o seu décimo aniversario. O aftermovie desta edición é unha peza documental que recolle os mellores momentos do festival e os testemuños dos seus protagonistas e mais fai unha retrospectiva do que foi esta primeira década do festival.

A pesar das súas diferentes orixes sociais, Amina, Djeneba e Zineb son tres adolescentes inseparables e mellores amigas desde que teñen uso de razón. Cando Zineb sofre acoso por parte do mellor amigo do irmán, Amina decide publicar un vídeo comprometedor nas redes sociais coa esperanza de que deixe de acosala. O que non sabe é que o vídeo non só porá en perigo a súa seguridade, senón que tamén porá a proba a súa amizade.

O cine de Pere Portabella é indisociable da arte e da política. Son disciplinas que se conxugan e retroalimentan desde unha actitude común: impugnar as normas, as sociais mais tamén as estéticas. Este é xustamente o título dun volume que reúne decenas de textos escritos polo autor durante sesenta anos, desde os seus inicios como produtor ata a actualidade.

Un vello, para non ser menos que un amigo paralítico, quere que a familia lle merque unha cadeira de rodas eléctrica. Para conseguila non vacilará con nada.

Na súa segunda longametraxe, Sōmai adapta con mestría a popular novela de Jirô Akagawa. Este gran éxito dos 80 preséntanos a Izumi, unha estudante de instituto que se converte na cuarta xeración de xefes dunha familia yakuza tras a morte accidental de seu pai. Un día, un detective aparece na súa porta e pregúntalle se ela sabía que o seu pai estaba involucrado no tráfico de droga. Tras isto, Izumi e a súa banda tópanse con moitos problemas…

Restaurada por Kadokawa Corporation a partir do negativo orixinal de cámara.

Imaxe ©KADOKAWA CORPORATION 1981

Versión restaurada en 4K deste clásico do cine xaponés e dunha das obras mestras que nos deixou Shinji Sōmai. Un tifón aproxímase á vila onde viven os novos protagonistas da fita, un grupo de estudantes de secundaria. Despois das clases, no medio da treboada e do tempestuoso vento do tifón, este grupo queda refuxiado na escola. No medio da tormenta, mostrarán as tensións, os desexos e as inseguridades que os días previos á tormenta foron formando entre eles.

Restaurada por Director’s Company a partir do negativo orixinal de cámara.