Presentación

As poetas Silvia Penas e Samuel Merino presentarán o mércores 30 de marzo ás 20:30h os seus respectivos poemarios: O resto é céu e Guantanamera. Poema nun só acto, editados por Urutau. As dúas voces poéticas teñen moito en común pois ambas acostuman moverse entre a poesía escénica e o teatro e xogan coa incorporación da palabra poética ao corpo a través da voz. En Guantanamera Samuel Merino bota man da escrita por non poder dar conta do acontecemento, da vivencia, da pulsión dos corpos vivos, precarios, inseguros, loitando contra a hostilidade do mundo.

A biblioteca cede o espazo para a presentación do Premio Simbad para o recordo e o alzheimer.

Casandra, Caleb e Calia son tres irmáns, cada cual máis insólito, que terán que aliarse para rematar coa tiranía imposta por un pai militar tartamudo e unha nai obsesionada coa psicoanálise e que os odia.

Na súa visita a Galicia, a escritora madrileña Belén Gopegui pasará pola nosa libraría para firmar exemplares dos seus libros e para un pequeno encontro co público que se queira achegar a NUMAX o vindeiro venres 25 de marzo ás 13:30 do mediodía. A autora tamén pasará o día antes, xoves 24 ás 18:00h, polo Consello da Cultura Galega onde impartirá a charla "Por que nos conta o que nos contan? É vostede normal? Normalidades e disidencias na pospandemia". 

Para asistir á firma na Libraría NUMAX non é preciso inscripción previa. 

A palabra e a voz son un principio de pracer en Palmeiras, piueiros, o libro co que Anxo Angueira regresa á poesía tras quince anos de silencio. Porén, non se trata só dun regreso: estamos ante unha visión global sobre o autor que Chan da Pólvora publica no seu sesenta aniversario e no que o acompañan as esculcas reveladoras de Chus Pato e de Xabier Cordal. Este luns, sete de febreiro, preséntase en Braga, como apertura da oitava edición das Convergências Portugal-Galiza, nun acto que contará coa intervención de José Cândido de Oliveira Martins.

Este libro sobre a etapa medieval de normalidade e esplendor do reino de Galiza e a crise da segunda metade do século XIV responde a un afán por combater a ignorancia colectiva sobre o noso pasado medieval e as deformacións e ocultacións sobre el . É , en certa maneira , un traballo a favor da saúde mental colectiva da sociedade galega . Xurdiu da necesidade de colaborar a un coñecemento sobre a nosa historia , entre os séculos VIII e XIV , radicalmente confrontado coa ocultación e terxiversación do oficial dominante .

Máis coñecida nos circuítos da poesía escénica baixo o nome de Nuria Vil e despois de publicar en diferentes antoloxías como dentes para a mazá, Nuria Vilán Prado dá o salto ao formato libro con Simún, é o seu primeiro poemario en solitario. O editor, Antón Lopo, dixo que os versos deste poemario “móvense entre o imprevisible e o cataclismo, entre o atrevemento e a loita contra unha mesma como índice de xenialidade”. A presentación en NUMAX será unha oportunidade para achegarnos aos versos enérxicos e violentos e a beleza fluorescente de Simún.

Tres irmás viviron sempre xuntas e, ata hai poucos anos, baixo a protección dunha nai que as mantivo afastadas dos perigos do mundo. Solteiras e xa octoxenarias, deixan pasar os días na mesma casa que as viu nacer, como tres haraganas, afogando os seus recordos con discusións, soliloquios e alcol.

Fundamentos, técnicas, alimentos, elaboracións, sabores... a cociña encerra unha infinidade de segredos nos que a ciencia e a historia enlázanse para desvelar extraordinarias historias.

Presentación do libro “Conversas arredor de Xorima”, de Paulo Naseiro, que describe a xénese e a traxectoria do grupo Xorima até converterse nun referente do folk galego nos anos 80 a través de conversas cos membros do grupo e con persoas relevantes da súa historia.

O libro está enmarcado no Proxecto Xorima, un proxecto transmedia en colaboración co Instituto de Estudos Chairegos para homenaxear e reivindicar a importancia deste grupo a través de distintos medios e plataformas.

O acto contará cunha breve actuación musical de Xorima.