Contacontos/Narración oral

Música en directo, contos con obxectos, cantos, poesía e tradición. Non é unha tarde calquera. É a tarde na que o bebé quedará, por primeira vez, na casa da avoa Mariña, quen tan pronto se divirte cunha paxariña ou come unha sardiña.  A avoa Mariña sabe moitos contos e xogos pero xa non se lembra do que era arrolar. Como fará a avoa Mariña para que o bebé durma? Chama por Pedro Chosco pero… Moito dá unha tarde de conto coa a avoa Mariña! Imos con ela?!

Duración: 30 minutos.

Idade: de 0 a 3.

Reserva de praza na biblioteca ou no teléfono 886 120 445.

"O bosque garda verbas, teixo, freixo, fento, xesta, loureiro..., con elas as nosas escritoras e escritores, dende Rosalía a Celso Emilio, de Cunqueiro a Xela Arias, levan tecido historias e poemas. As nenas e nenos da biblioteca Nodal de Vigo tentarán axudar a plantar e regar estas verbas para que sigan tecendo poemas e historias das letras galegas."

Duración: 45 minutos.

Idade: de 4 anos en adiente.

Reserva de praza na biblioteca ou no teléfono 886 120 445.

A nai promete que sempre vai facer o necesario para que avance o fillo…e o neno da oito pasos coma oito versos. E así faremos nós con versos e relatos de Xela Arias, viaxaremos ao universo poético e narrativo da homenaxeada do Día das Letras Galegas do 2021. Xela non só foi unha grande poeta, tamén foi editora e unha das primeiras tradutoras profesionais. Seu traballo achegou a nenos e nenas e tamén aos maiores, grandes autores da literatura universal. Oito pasos…oito versos é un espectáculo de narración oral, con relatos e versos de Xela Arias.

Duración: 50 min. 

Imos plantar un feixe de árbores da paz na biblioteca Anxel Casal, árbores que farán respirar concordia, tenrura, cooperación, igualdade e defensa da natureza. As árbores da paz é unha proposta de viaxe no coñecemento e coidado dos bosques e a solidariedade cos mais desfavorecidos da man do "atrapador de contos" Anxo Moure, autor do libro "As árbores da paz" do proxecto Contos Solidarios que fomenta a cultura ambientalista e de cooperación.

Servando Barreiro traballa, nesta ocasión como músico, coa obra poética de Xela Arias, na sonoridade e ritmo das súas palabras.

No salón de actos. Para nenas e nenos de 3 a 8 anos. As persoas interesadas poden retirar a invitación no mostrador de Información da biblioteca dende 30 minutos antes do comezo da actividade.

Unha sesión de contos para gozar, deixar voar o maxín e coñecer algúns dos legados deixados na nosa terra por Xela Arias.

No salón de actos. Para nenas e nenos de 3 a 8 anos. As persoas interesadas poden retirar a invitación no mostrador de Información da biblioteca dende 30 minutos antes do comezo da actividade.

Nos anos 80 do século pasado, unha moza, ademais de escoitar rock, abría novos camiños a través da súa poesía, na nosa literatura. Xela Arias foi unha muller valente, feminista, activista e comprometida co galego desde a súa nenez. Foi poeta, editora, tradutora e mestra. Para coñecela mellor, entremos nos seus versos. Vide! Convídovos ao espectáculo de non ser para ser de todo.

No salón de actos. Para nenas e nenos de 3 a 8 anos. As persoas interesadas poderán retirar a súa invitación no mostrador de Información da biblioteca a partir das 11.30h.

Bea Campos de Migallas Teatro presenta o contacontos 'Orella pendella', para bebés de 0 a 3 anos.

Inscrición ata 15 familias. Esta actividade propón aprender e xogar cos ditos infantís de sempre e con cancións tradicionais acompañadas de música en directo, tomando como base orellapendella.gal

Sábado 17 de abril, nos xardíns do Doutor Marescot. Recoméndase levar unha mantiña ou esteira para sentar no chan.

Primeira sesión de 11.30 a 12.05 h.

Segunda sesión de 12.30 a 13.05 h.

As enxeñosas do fidalgo é unha narración musicada coa que a Cidade da Cultura quere sumarse aos festexos ao redor do Día do Libro (23 de abril) e que xuntará no Xardín do Teatro, da Cidade da Cultura,  a Soledad Felloza e a Banda Municipal de Santiago para pór en valor as personaxes femininas de O Quixote: a pastora Marcela, Tareixa Panza, Quiteria, Claudia, etc.

Un divertido contacontos para nenos e nenas, realizado por unha das escritoras máis recoñecidas na literatura infantil e xuvenil na actualidade. Baseado na obra da autora dirixida ao público infantil, propón un contacontos onde se valora a personalidade, a diferenza que nos fai únicos, e o valor necesario para converter isto nunha fortaleza.