A Cidade da Cultura acolle a xornada CreaGaiás, unha iniciativa lúdico-formativa que nace co obxectivo de potenciar o emprendemento e a creatividade, así como darlle visibilidade as empresas e proxectos residentes no Centro de Emprendemento do Gaiás. Nesta primeira edición, CreaGaiás pon o acento na imaxe e en como empregala de forma eficaz a través das redes sociais para facer visible o traballo das persoas emprendedoras.
A Real Academia Galega dedicaralle o Día Mundial da Poesía a Xohana Torres. A escritora e académica de número, falecida o pasado mes de setembro, será recordada o 21 de marzo nun acto literario e musical, no que poetas de distintas xeracións e amizades da autora lerán e comentarán desde unha perspectiva persoal fragmentos da súa obra. Guadi Galego e Guillerme Fernández poranlle música a esta homenaxe.
Atlantic Emprende + Gaiás propón un espazo de encontro entre profesionais, emprendedores, estudantes e empresas da industria musical. En total serán dous días de conferencias, formación, espazos de debate e networking, que pecharán con cadanseu concerto acústico de artistas do panorama galego actual.
Os asistentes poderán coñecer mellor a realidade do sector musical e os seus retos e oportunidades, así como explorar novos mercados e liñas negocio, tanto dentro do sector como noutros ámbitos que busquen potenciar o seu negocio traballando coa música como ferramenta.
A segunda xornada do ciclo Entre... e a arte, Entre a comunicación e a arte, aborda a visión da arte desde os coñecementos en Ciencias Sociais e Comunicoloxía. A cuestión é, como apuntan os organizadores, a de reflexionar sobre as imaxes artísticas desde a circulación das imaxes en xeral, non necesariamente artísticas, nos medios, nas redes sociais e en internet.
A Real Academia Galega e a Universidade de Vigo celebran un acto académico-literario arredor do Pergamiño Vindel. O programa desenvolverase o xoves 1 de marzo, a partir das 12 horas, no paraninfo da reitoría da Universidade de Vigo.
Intervencións académicas
Camiño Noia Campos Cantigas de amigo, cancións de muller
Henrique Monteagudo Ao son das ondas
Xesús Alonso Montero O macrotexto das sete cantigas de Martín Codax: unha noveliña dramática de amor
Interpretación musical
Roi Casal
O vindeiro 24 de febreiro, con motivo do Día de Rosalía, proxéctase o documental A palabra xusta no salón de actos do concello de Fisterra. Esta obra está centrada na figura de Antía Cal, creadora da Escola Rosalía de Castro en Vigo, referente da renovación pedagóxica.
A continuación haberá un recital poético da obra de Rosalía.
Esta xornada estará a cargo de Ana María López Cuadrado, funcionaria do Corpo Facultativo de Arquiveiros e Bibliotecarios do Estado dende 2007. Traballa no Centro de Información Documental de Archivos como responsable da Área de Normalización, coordina o Censo Guía de Archivos de España e Iberoamérica e os traballos de normalización de autoridades arquivísticas dentro da Plataforma Portal de Archivos Españoles (PARES).
Aproveitando o 140 aniversario da primeira viaxe de Jules Verne a Vigo e o 150 aniversario da visita do Nautilus de 20000 leguas de viaxe submarina, Vigo acollerá unha serie de eventos centrados na figura do escritor. Unha conferencia sobre Verne a cargo de Piero Gondolo della Riva, un roteiro literario ou unha ofrenda floral serán algunhas das actividades previstas, así como varios paneis de expertos que abordarán dende as novidades científicas e tecnolóxicas das novelas do escritor francés ata o seu potencial no terreo educativo.
A primeira edición do Regueifando Lalín reúne distintas iniciativas para potenciar a tradición das regueifas, desafíos improvisados en verso entre dous grupos.
Ao longo da mañá haberá unha serie de obradoiros sobre a regueifa en dous institutos da vila.
Pola noite celebrarase un festival de regueifas, no que participarán ata 3 grupos de regueifeiros profesionais. Será a partir das 22.00 horas, na carpa Mahou do campo da feira, e tamén haberá degustacións de balde.
O 11 de febreiro celébrase o Día internacional da muller e a nena na ciencia, e a iniciativa do mesmo nome, 11 de febreiro, quere axudar á visibilización do traballo das profesionais de carreiras STEM (acrónimo en inglés de ciencia, tecnoloxía, enxeñería e matemáticas) mediante unha serie de iniciativas por toda España. Buscan tamén contribuír á creación de roles femininos e a lograr a igualdade de xénero nos ámbitos científicos.
