Novo circo

Isla Letriska presenta este delirante espectáculo no cal combina disciplinas de novo circo como malabares, pallaso ou equilibrios xunto a excentricidades e xogos co público. Un personaxe eléctrico e bastante tolo sorprenderá a todos realizando proezas como malabares incribles, memorizar centos de nomes, darlles novos usos a obxectos cotiáns, pelexar co público ou converter a un neno nun grande artista de circo. Habilidade, perspicacia, velocidade mental e sobre todo tolería, moita tolería. Pequenos e grandes sacarán ao tolo que levan dentro.

"Nono", un inocente clown que fará viaxar ao público polo seu mundo de fantasía, un mundo no que tentará mostrar os seus mellores trucos de malabares aínda que os problemas aparezan en cada esquina, aínda que ao final, sempre se acaban resolvendo con moito humor.  Podendo gozar de incríbles malabares, unha pelexa encarnizada cun mosquito, a aparición do seu inseparable amigo o mono, un combate de boxeo, e moito máis.
Todo isto, nunha combinación de mimo, malabares, manipulación de marionetas, clown e un mundo sen palabras.

Quimera é un espectáculo inspirado nunha visión máxica da natureza, onde os soños e a mitoloxía se entrelazan.

Calquera ilusión, produto da psique, por improbable que pareza pódese tornar realidade.

Mediante unha linguaxe visual e acrobática esta viaxe fantástica estimula a imaxinación do público ata o final.

Elenco artístico: Tatiana Fontenla García / Iván Couso Campos / Fàtima Carbia Lorenzo / David Burgos Ruibal / Carolina Ramil Sanders /  Felipe Catalán Arufe e Alejandra Balboa Rodriguez

En Animacreques, a partir da técnica circense dos zancos e o virtuosismo da danza, xorde esta proposta de animación e intervención na rúa.

Ánxela Blanco e Vanessa Rivas (Catropés) propoñen un xogo visual que permitirá ao público participar e gozar desta peculiar relación entre monicreque e titiriteira.

Que pasa cando dúas amigas non se ven dende fai tempo? Que se traen entre elas?

Intencións e emocións ocultas expostas á mirada da xente que pasa ao redor desta casa sen paredes

Risas, mimos, líos e anécdotas pasan neste piso moderno de 12 metros cadrados ... 

Moita, moita historia é a que teñen entremáns elas dúas. Compartindo a súa intimidade co público achegado. 

Elementos: Mástil chinés, acrobacia, manipulación de obxectos dende o prisma do teatro físico e a danza contemporánea.

Compañia Duelirium. Formada por Raquel Oitavén e Mercé Solé.

Un belo día é un proxecto de vida construído por Doce Duca e Iris. Vida en forma de espectáculo. Doce Duca incorpora o malabar, a manipulación e os equilibrios de mazas cunha linguaxe corporal única e impactante, transmitindo emocións nunha peza que integra e intriga ao público de todas as idades.

Un belo día nace das entrañas e conecta co espectador de maneira primordial, pura e simple. Tras tres anos de traballo chegou o momento de liberalo nas rúas, os teatros, as prazas públicas, as salas e os xardíns. 

Un espectáculo interactivo onde os nenos/as e os que non son tanto disfrutarán das divertidas aventuras e desventuras destes dous pallasos, nunha constante sucesión de gags cómicos cheos de tenrura e absurda realidade.

Os xogos, as torpezas e o inocente inxenio de Lela e Lolo farán que a risa e a sorpresa sexan un referente no desenvolvemento do show. Un espectáculo onde a participación do público é unha parte fundamental da función.

Que pasaría se a nosa vida fose sincronizada como o Tour de Francia ou como os saltos sincronizados? E se nos comportásemos como certos deportistas na nosa rutina diaria? Este espectáculo baséase no cotián da vida retransmitida como un deporte en directo para crear un mundo rexido polo absurdo, onde o xesto deportivo e o mundo real son mesturados nunha quimera de disparate continuo. Estas situacións cobran vida grazas á combinación de técnicas como a danza e os portes acrobáticos.

Como sería a vida se fose eterna? É a morte o motor que nos fai vivir? 

Se queredes saber a resposta a estas preguntas, o sentimos, Mr. Lupo non as ten, pero o que si ten é unha habilidade indiscutible para vivir a vida en cada intre. Durante os 50 minutos que dura o espectáculo Mr. Lupo poñerá a súa vida no fío do abismo, lanzando obxectos afiados, facendo equilibrios imposibles, domando un elefante ou facendo saltos mortais polo aire.

Espera é un espectáculo de circo participativo onde o público é convidado, dun xeito moi sensible e sutil, a vivir de cerca as acrobacias que ocorren na escena. 

Cando o límite entre escenario e público desaparece, o espectáculo convértese nunha ocasión para compartir experiencia colectiva, onde nos miramos á cara con descoñecidos e escoitámonos cos corpos.