Teatro

Unha creación antropolóxica que mestura teatro, danza e música para reflexionar sobre a identidade galega e a súa evolución. A peza aborda a perda progresiva do folclore e da lingua, reivindicando a tradición como espazo de resistencia e transformación. A obra afonda na esencia da identidade galega a través da fusión da danza tradicional galega coa danza neoclásica e a música contemporánea. A través da teatralidade e do poder evocador da danza, Proxecto Identidade reivindica o valor da nosa cultura como ferramenta de identidade e resistencia.

Ándale, Bon appêtit! é unha reposición da exitosa obra de teatro Ghazafelhos ‘Bon Appêtit’. Nesta ocasión, os nosos queridos chefs Felipe, Antonio e Francisco prepararán deliciosos pratos mexicanos facendo un pequeno repaso pola historia do país. Tamales, enchiladas, tacos... unha chea de receitas aderezados co humor dos Ghazafelhos e acompañadas coa aparición de personaxes como Pancho Villa ou Frida Kahlo. Coma sempre, a participación do publico será imprescindible.

Isabel Risco e Fran Rei en Retrincos de Castelao fan un achegamento ao particular humor na obra do inmortal autor de Rianxo, figura fundamental da nosa cultura e da nosa historia.

Deadpan, do inglés “cara morta, baleira de expresión, imperturbable”; Karaoke, do xaponés kara (‘baleiro’) e oke (‘orquestra’).

Deadpan Karaoke é un espectáculo unipersoal de carácter participativo que propón como ingredientes principais o absurdo, a estupidez, a sorpresa, a comedia, a música e o cine, todo enmarcado nun espazo que transite do real ao onírico cunha clara ambición plástica e que capture o carácter sublime do amor a través de momentos de gran beleza. 

IRIBARNE é un tipo nado na mesmísima vila de Rouco Varela (si: o cardeal) durante a Monarquía de Alfonso XIII (o primeiro promotor do cine porno en España?, si-si: ese). Emigrado a Cuba con tan só un aniño -coincidindo con inauguración da ditadura de Primo de Rivera- tras facer as Américas durante un par de anos o noso protagonista volve triunfante para ser o fillo do alcalde (e o da francesa!).

“Mala vida e pior morte do rei Ricardo III, mais non a glosada polo aclamado poeta William Shakespeare” é un  espectáculo unipersoal con Evaristo Calvo no que a través dun monólogo dirixido á audiencia o personaxe do difunto rei Ricardo III de Inglaterra, argumenta en contra do relato dos derradeiros anos da súa vida que Shakespeare deixou trazado no drama “A vida e a morte do rei Ricardo III”.
 

Gaia unha nena moi inquieta comparte con nos o xogo máis xogado da súa aldea mentras nos explica a tolemia que asolou na súa aldea a primeira vez que chegaron novos veciños. 

Unha divertida comedia musical onde cantarás, bailarás e rirás á esgalla coa Tía Maruxa e a súa gracia natural e con Don Rosmón .. e.. digo Don Ramón e … a súa arte de rosmar.

Nun futuro non tan afastado, a tecnoloxía trasformouno todo… Incluso a forma en que lembramos o pasado. En Nas Nubes, Nexus e Rino guían a visitantes por un museo que exhibe estrañas reliquias da era predixital. O que comeza como unha sátira sobre o noso presente, pronto se converte nunha inquietante reflexión cando as bolboretas que emerxen dun bonsai comezan a lembrar que foron algo máis… Seres humanos? Monicreques?

Os tres porquiños é unha obra musical con bonecos a tamaño real. Unha revisión da tradicional fábula para adaptala aos novos tempos, incluíndo a gura de Xan e Xiana, dous exploradores moi afeccionados aos contos, que se adentran no bosque para coñecer os seus personaxes favoritos.

Na súa viaxe, ademais de descubrir a historia, os tres porquiños bailarán ao ritmo das cinco cancións -cantadas en directo- que compoñen o espectáculo, e que teñen unha clara misión didáctica para que os máis pequenos aprendan ou reforcen coñecementos como os números, as cores ou as prendas de vestir.

VITÓRIA é o retrato dunha denuncia. Unha peza de teatro autobiográfico que conta o proceso xudicial ao que se someteu a actriz Iria Pinheiro cando interpuxo unha denuncia por acoso sexual contra o director do programa de televisión no que traballaba.

A peza reconstrúe a historia que vai desde 2017 a 2023, intercalando a documentación xudicial do proceso co xogo e a ironía características do cabaret.