Producida pola Fundación DIDAC co apoio de Instituto Vasco Etxepare, a exposición MIRROR RIM do artista Alain Urrutia mostra un total de once novas pinturas que presentan imaxes que se poden voltear sen deixar de funcionar dende o punto de vista plástico. O traballo de Alain Urrutia analiza novas lecturas de imaxes preexistentes, fragmentando e reconstruíndo a realidade das mesmas.
En maio a exposición chegará ata Lisboa.
Mostra da obra do pintor José Ramón Morquecho. Artista de formación autodidacta, Morquecho leva máis de catro décadas de traballo, con exposicións tanto individuais como colectivas en localidades de Galicia e España.
A mostra poderá visitarse na Sala de Exposicións do Pazo de Torrado ata o 7 de xaneiro, de martes a domingo de 17 a 20 horas.
A exposición Materia Infinita amosa o novo traballo do escultor ourensán Xosé Cid.
Comisariada por Rosendo Cid, a mostra reúne máis de 20 pezas de mediano e gran formato, en madeira, mármore, pedra e bronce, de estrutura totémica. Esta é a primeira exposición na cidade do escultor desde o ano 2011
Parafraseando o título de, se cadra, a novela máis experimental de Julio Cortázar, 62/Modelo para armar, a exposición trata a colección como un modelo por construír, como unha tarefa imprescindible pero pendente, e sempre en proceso, para un museo.
A mostra, que está comisariada por Santiago Olmo, propón unha posible historia da arte feita en Galicia a partir de pezas que conforman a Colección CGAC, entre a colisión e o diálogo, á maneira dunha aproximación crítica sen pretensións totalizadoras e exhaustivas, sobre a base das condicións da propia historia do museo.
Unha das artistas españolas máis cotizadas no mundo, soada no circuíto internacional polos seus retratos craquelados, Lita Cabellut, desenvolveu o seu traballo nunha procura obsesiva da beleza encarnada no corpo humano.
Máis aló das súas técnicas máis recoñecidas en pintura, a súa obra alcanza a totalidade dos xéneros e disciplinas: desde a escultura á fotografía, a instalación, o vídeo ou a performance, sen excluír a escenografía operística, a ilustración e a obra gráfica.
Eduardo Batarda (Coímbra, 1943) é un dos artistas máis recoñecidos de Portugal e Mise en abyme a súa primeira exposición individual en España. Coñecido polas súas pinturas e acuarelas, o seu traballo viuse influenciado nos seus comezos polo pop inglés, o cómic e a ilustración, entre a figuración e a abstracción. Esta exposición está comisariada polo recoñecido artista portugués, Julião Sarmento, que ofrece a súa particular mirada, cómplice, á obra de Batarda, e foi ao mesmo tempo compañeiro en exposicións, admirador e coleccionista do seu traballo e, neste caso, comisario.
A obra de Álvaro Negro protagonizou en Galicia exposicións individuais na galería Sargadelos de Santiago e Marisa Marimón de Ourense, así como na recentemente desaparecida SCQ. Tamén integrou a nómina de mostras colectivas importantes como Novos camiñantes ou o ciclo Miradas virxes. Agora, o CGAC repasará a súa traxectoria.
A retrospectiva recolle varios dos traballos de Siro. Con este proxecto preténdese dar a coñecer a evolución artística deste humorista gráfico.
A mostra é a primeira retrospectiva que se fai deste artista. Nela amósase unha ampla escolma da súa extensa obra, mostra que se estrutura atendendo ás diferentes facetas artísticas nas que traballou: debuxo, deseño, pintura, caricatura, etc., sen esquecer a súa actividade como escritor.
‘A través dun horizonte sen corpo’ é o proxecto de Fredy Solano (El Salvador, 1992), que resultou gañador o ano pasado no Certame de Intervencións Artísticas nas Torres Hejduk. A esta convocatoria pódense presentar os participantes no Encontro de Artistas Novos ‘Cidade da Cultura’.
Na illa de Shikoku existe unha importante peregrinación ligada a un camiño vinculado á memoria dunha das figuras relixiosas máis importantes de Oriente: o monxe Kukai, máis coñecido como Kobo-Daishi, gran mestre budista que predicou e difundiu no século IX o budismo esotérico en Xapón, importado de China polo propio monxe.
Esta peregrinación é unha viaxe por unha ruta espectacular, ao longo de mil catrocentos kilómetros trazados nas catro prefecturas de Shikoku: Tokushima, Kochi, Ehime e Kagawa.
