FalaRedes

Este 2021 cúmprese o oitavo centenario do nacemento de Afonso X, o rei sabio, o que compuxo en galego as Cantigas de Santa María, unha das obras cume da poesía e da música medievais europeas.

Como parte da celebración deste acontecemento, o programa de dinamización lingüística FalaRedes propón, entre outras iniciativas, Sabios, xogos e xograres. Ambientada na época do rei-poeta Afonso X, a actividade inclúe unha presentación inicial, un obradoiro de xogos medievais e unha competición de xogos ao vivo.

Talía Teatro volve ao FalaRedes, desta volta cunha comedia, un divertido espectáculo-collage para público a partir de 12 anos que fala da situación que atravesa a lingua galega e que está destinada a todo o mundo, independentemente da súa posición respecto aos idiomas: aos galegofalantes, aos que non o son, aos que queren selo pero non se atreven, aos que si queren selo e tomaron esa determinación, aos que non o falan porque non o saben falar ben, aos que tanto lles ten que se fale ou non, aos que pensan que o galego debería ser a lingua universal, aos que pensan que debería ser o inglés a

Libre coma os paxaros, da compañía Teatro do Atlántico, é unha peza teatral para público adulto e adolescentes de máis de 14 anos en que a figura protagonista é Rosalía de Castro, quen, interpretada por María Barcala, se dirixe ao público en primeira persoa compartindo as particularidades da súa propia orixe, do seu pensamento, da súa circunstancia social e dos condicionamentos que ten que superar para ser quen de exercer a creación poética e literaria.

O programa de dinamización lingüística FalaRedes e a Rede de Dinamización Lingüística súmanse á celebración do 800 aniversario do nacemento de Afonso X O Sabio, promotor dunha das obras cume, non só da literatura en galego, senón de toda a literatura e a música europea medievais, as Cantigas de Santa María. Fano a través do espectáculo Estrela do día, da compañía Producións Teatrais Excéntricas.

Por primeira vez, Teatro do Noroeste participa no programa de dinamización lingüística FalaRedes e faino cun espectáculo teatral para público adolescente e adulto interpretada por Miguel Pernas, Luma Gómez e Manuela Varela.

A través da figura de Uxío, un escultor e pintor considerado polos seus contemporáneos unha gloria nacional, a peza convídanos a reflexionar sobre o lugar que ocupan a creación artística e a cultura na sociedade actual.

Gloria nacional estará este outono, da man do FalaRedes, en Ortigueira, Barreiros, Cariño e Ponteareas.

Romeo e Xulieta: o soño do amor, da compañía Elefante Elegante, é unha adaptación do clásico de Shakespeare, un espectáculo teatral dirixido a público adulto que estará seguido dun coloquio dos actores co público guiado por María Lado. A peza trata temáticas de relevancia na actualidade e pon o foco na igualdade de xénero.

A Rede de Dinamización Lingüística levará esta peza ao Culturgal e mais a dous concellos da Rede de Dinamización Lingüística: Melide e Sanxenxo.

O coñecido músico infantil Pakolas e a ilustradora Laura Romero únense nun espectáculo musical e visual para público familiar e infantil que lle ofrece á rapazada a posibilidade de participar das aventuras de Ramona Órbita na procura da tecnoloxía para conseguir xerar enerxías limpas e así conseguir mellorar o noso mundo. Mentres Pakolas conta, canta e toca a súa guitarra, Laura irá ilustrando a historia no seu cabalete/mural.

Un espectáculo de ilusionismo para público familiar, que emprega o humor e a participación para recuperar a memoria do que somos e o valor da nosa lingua.

A amizade, o amor, o bo humor, o enxeño e a intriga van da man. Cóntase a historia dunha cómica ambulante que transita polo Camiño de Santiago armada de poesía e pandeireta e que chega cansa a unha pousada onde se atopa con diferentes hóspedes que teñen moito que contar. Ela mesma tamén é portadora da nosa rica tradición oral. Da súa boca abrollan ditos, trabalinguas, adiviñas, contos e lendas.

Este outono, as súas historias chegarán, da man do FalaRedes, aos seguintes concellos da Rede de Dinamización Lingüística: Ribadavia, Mondoñedo, Bergondo e Vila de Cruces.

No 40 aniversario da morte de Álvaro Cunqueiro, o programa de dinamización lingüística FalaRedes réndelle homenaxe ao ilustre mindoniense con esta peza de Sarabela Teatro baseada na súa obra As crónicas do sochantre. Trátase dun espectáculo teatral e musical para todos os públicos cheo de humor e de sensibilidade. Acollerán as representacións Cambados, Mondoñedo e Padrón.