Festicultores Troupe presenta un novo espectáculo cheo de positividade, optimismo e bo humor co que busca contaxiar, a través da música, a ledicia e as ganas de vivir desde o seu innovador escenario móbil de tecnoloxía punta alieníxena-galaica.
O repertorio do espectáculo consta de pezas propias, a maioría inéditas, que tratan de poñer en valor a cultura e a lingua galegas e tamén temas tradicionais galegos versionados ao seu estilo festeiro.
A máquina do tempo é un espectáculo participativo que ilustra de xeito ameno e pedagóxico a historia das civilizacións.
Coa axuda dunha sorprendente escenografía, a doutora Mon (Montse Piñón) e o seu axudante Pe (Pepablo Patinho) levarán os nenos e nenas a facer un apaixonante percorrido pola historia.
A máquina do tempo chegará este verán a cinco concellos da Rede de Dinamización Lingüística: Arzúa, Aranga, A Bola, Lalín e Xove.
Pepo Suevos creou este monólogo humorístico a partir da súa propia experiencia para animar os millenials a empregar a lingua propia de Galicia en todas as situacións da súa vida.
Este espectáculo fará parada este verán en seis concellos da Rede de Dinamización Lingüística: Viveiro, Moaña, A Laracha, O Pereiro de Aguiar, A Estrada e Carral.
Con Derriba da Lúa queremos arrolar, contar, cantar, recitar e xogar en familia para soñar e medrar libres coma paxaros, de Candeloria a Candeloria.
Antes do principio do todo había a nada. Despois chegou o vento, que moveu a nada. Co movemento saltaron tres chispas: a primeira apagouse e naceu a Lúa. A segunda quedou acesa e naceu o Sol. A terceira comezou a xirar e naceu a Terra. Na Terra hai un carballo\No carballo hai un niño. No niño hai unha merla que choca tres ovos...
Da man da compañía Teatro Avento Producións chega esta peza infantil e familiar finalista ao mellor espectáculo infantil nos XXIV Premios de Teatro María Casares 2020.
Sumándose á tendencia de amor polo culinario, a acción deste musical dirixido a público a partir de 3 anos de idade, desenvólvese na pastelaría de dona Remedios, onde Ana (Rocío Salgado) e Lito (Martín Maez) terán que chegar a un pacto para defender os seus intereses.
O ciclo incluirá as seguintes longametraxes rodadas en galego:
Longa noite (Caldas de Reis)
Arima (A Rúa, Tui e Baiona)
Trote (O Porriño e Pantón (en colaboración co Consorcio de Turismo Ribeira Sacra) )
O que arde (A Estrada, Mos e Vigo)
Eroski Paraíso (Negreira)
Alí onde se proxecte Arima, o público contará coa presenza da directora do filme, Jaione Camborda, con quen se establecerá un coloquio. No resto dos casos, haberá dobres pases da película.
Polo Camiño, contos da feira narra a historia dunha feira onde conflúen seis personaxes que cos seus contos e cantos fan voar a imaxinación dos asistentes: a minuteira, o fistor, Pepa a Loba, Pepa das Mulas, o vendedor de tarabelas e a posticeira. Trátase dun espectáculo para todos os públicos no que se empregan títeres de luva, marotas e títeres de táboa.
Ninguén coñecía os camiños mellor ca os arrieiros. Estes eran, na súa maioría, homes, pero Atenea García (narradora) e Nicolás Zamorano (músico) vannos presentar unha arrieira coñecedora dos vieiros e das súas xentes. A arrieira, no seu percorrido, tiña atopado historias de vida, seres míticos, lavandeiras e afiadores e, coma un tesouro, fora gardando todos eses saberes e sentires na súa memoria. Había quen dicía que pedía contos a cambio de cantares: "Regáloche unha cantiga se me contas un conto". Así o cesto da arrieira cargábase de historias recollidas nos carreiros.
Tres contadores galegos -Xurxo Souto, Beatriz Campos e Quico Cadaval- comparten escenario para deleitarnos cun guión inspirado no Camiño de Santiago, baseado en lendas e historias peculiares e centrado no humor.
O programa de dinamización lingüística FalaRedes presenta este concerto infantil e familiar do dúo formado por María Faltri (voz) e Jorge Juncal (guitarra), que interpretarán cancións do seu disco Fantasía coas palabras, un traballo pensado para que os nenos e nenas aprendan as letras dun xeito divertido.
