Os Bolechas non podían faltar á súa cita anual co FalaRedes. Sonia, Tatá, Pili, Loli, Carlos e Braulio, acompañados polo seu fiel can Chispa, pararán en 21 concellos da Rede de Dinamización Lingüística para falarlles aos máis pequenos da casa dos membros da familia.
O músico Xoán Curiel e a contadora Charo Pita reúnense neste espectáculo familiar que xira arredor dos relatos populares galegos e mais de cancións que o autor das Letras Galegas deste 2019 recolleu nas súas Aportacións ao Cancioneiro de Cotobade.
Terrícolas igualiños igualiñas é unha actividade que a RDL pon en marcha en colaboración coa Consellería de Educación, Universidade e Formación Profesional.
A quinta das propostas do programa de dinamización lingüística FalaRedes 2018 é unha peza teatral dirixida a todos os públicos a partir de 3 anos e inspirada no universo literario do escritor mozambicano Mia Couto e no conto popular O flautista de Hamelín, recollido polos irmáns Grimm. No espectáculo que a compañía do Elefante Elegante crea para a Rede de Dinamización Lingüística, a temática xira arredor do medio natural e de como vivir en harmonía con el. Trátase dun alegato para unha vida respectuosa do ser humano coa terra que o acolle.
Xoán Curiel e a Banda Son+d2 presentan no FalaRedes o seu novo espectáculo: A casa do terror, que será un libro-disco editado por Galaxia ao longo do ano 2018.
A casa do terror é unha aventura, na cal un grupo de amigos se ve obrigado a durmir nunha casa encantada e vive aventuras divertidas e terroríficas relacionadas coa música, a amizade e a superación dos propios medos.
Tatá, Sonia, Braulio, Loli, Pili e Carlos vivirán a canda os nenos e nenas de 21 concellos da Rede de Dinamización Lingüística unha nova e divertida aventura que servirá, ademais de para pasalo ben, para mostrarlles aos máis pequenos a importancia de coidarmos o monte e a maneira de facelo, iniciándoos na prevención dos incendios forestais. O obxectivo é fomentar, a canda a educación ecolóxica dos cativos e cativas, a súa participación en galego na resolución do conflito proposto no guión.
En abril e maio FalaRedes réndelle homenaxe á autora a quen se lle dedica este 2018 o Día das Letras Galegas: María Victoria Moreno. Faino coa peza teatral de Matrioshka Teatro Señora que pasea pola rúa con dous cans preciosos, un percorrido pola vida e a obra da escritora, que se definía a si mesma coas palabras que lle dan título á obra.
FalaRedes trae unha actividade musical dirixida a cativos de 4 a 9 anos e ás súas familias. Un concerto en que os protagonistas serán os nenos e nenas, aos que se convida a participar cantando, bailando e falando. Coñecerán as historias de Baldomero o mero, do parrulo McPac, do rato de Xaquín... e de moitos outros animais da man do músico infantil Pakolas, Paco Cerdeira, que presenta neste concerto o seu primeiro traballo en solitario, tras o seu paso polas formacións Mamá Cabra e Gramola Gominola, da que é fundador e integrante.
Un ano máis chegan á Rede de Dinamización Lingüística os seis irmáns Bolechas creados polo debuxante Pepe Carreiro.
Tatá, Sonia, Braulio, Loli, Pili e Carlos están facendo o Camiño de Santiago e paran na pensión de Eustaquio acompañados do seu can Chispa. Eustaquio acepta darlles aloxamento a cambio de que xoguen con el a un peculiar xogo da oca que os obrigará a superar, coa axuda e participación do público, diferentes probas de habilidade e de coñecementos culturais adaptados a rapaces de 4 a 10 anos.
A música, con todo o seu potencial para a aprendizaxe e a transmisión afectiva das linguas, non podía faltar na actividade que FalaRedes lles dedica aos máis pequenos: un concerto para nenos de 0 a 7 anos e ás súas familias, onde Pablo Díaz -acompañado de Diego Barral ás guitarras e de Álex Fente ao acordeón- interpreta cancións do seu último libro-disco, Tic Tac Toc, e fai un repaso dos temas máis emblemáticos dos anteriores traballos Tic Tac e Toc Toc . Poderedes desfrutar desta actividade en 19 concellos da Rede de Dinamización Lingüística.
