Novo circo

Como conseguir evitar que o medo te paralice, cando eres pequena e todos te din que non podes? A clave está en SUPERHARTE. Un espectáculo cunha mensaxe de empoderamento para todo o público, os adultos, os nenos e sobre todo as nenas: vencer o medo e ser capaz de facer o que semella imposible. Buscando a confianza en si mesma e grazas ao apoio do público, Patty conseguirá chegar ao máis alto. Compartindo polo camiño a alegría da superación constante dos temores máis profundos. Todo isto con moitas risas, acrobacias, bailes e o globo máis grande que poidas imaxinar.

Rogelio é un entrañable personaxe de ficción e esta é a última entrega dunha triloxía. Que pasaría se ninguén viñera ao teu aniversario? Se ninguén cantara os parabéns para ti? Rogelio volve estar só e desta vez no seu día máis especial. Queres acompañalo? Un espectáculo de risas para toda a familia no que o actor Dani Blanco dá continuidade á saga do pallaso Rogelio. Circo, clown, corda frouxa, malabares e música e sobre todo moito humor.

Rogelio 3. La fête é unha coprodución de AsSircópatas e a Mostra Internacional de Teatro Cómico e Festivo de Cangas.

Unha parella de guerreiros forxados polo amor e a batalla fan unha danza poderosa e cargada de emoción que deslumbra con efectos visuais impresionantes. É unha ofrenda aos deuses do lume de todas as tradicións ancestrais. Con moito ritmo e sen palabras, unha forma explosiva de transformar as técnicas de manipulación con lume a un espectáculo espiritual, ancestral pero tamén moi contemporáneo. Un espectáculo potente e místico que promete un experiencia visual e sensorial inesquecible.

No seu terceiro espectáculo de clown unipersoal, Rudi Dudi dá un paseo, co público da man, por un arco da vella de emocións. Mimo, baile excéntrico, música, maxia e malabares son algúns dos ingredientes dun show divertido, sorprendente e moi interactivo, que nos amosa as diferentes cores que cada un levamos dentro.

Tres amigos, tres personalidades, tres caracteres moi distintos embárcanse na aventura de pasar unhas vacacións xuntos. Pero a convivencia non sempre é cousa fácil. E os conflitos toman parte na escena cotidiá dos campistas.

Superarán os nosos personaxes o reto de compartir un espazo común con elegancia?

Que pasa cando se torcen as cousas?

"O roce fai o cariño", din...

Glamping é un espectáculo sobre as relacións humanas, onde calquera poderíamos ser ese personaxe en tensión, buscando a mellor maneira de resolver a situación.

Vehículo con equipo de son onde o noso batería sacará ritmos electro-tribais en directo, e irá acompañado de catro marionetas xigantes, con coreografías,  luz e pirotecnia, e moita interacción co público.

Unha experiencia explosiva e ardente de acción sen pausas! "Circo de Lume" está deseñado para captar toda a túa atención, darche calor e deixarche hipnotizado. Este show ofrece unha infinidade de números vibrantes que fusionan danza, malabares, pirotecnia, conexión próxima co público e unha faísca de humor impredicible. Cada acto brilla con efectos visuais asombrosos elevando a técnica de manipulación con lume á súa máxima expresión. Un show que leva a arte de lume a novas alturas e que desafía os límites do posible

Este é o primeiro espectáculo no que Peter Punk comeza a súa andaina como pallaso. E no que se perfila a súa personalidade divertida e irreverente, que fará as delicias d@s cativ@s e tamén dos maiores, creando un universo propio no que a linea de traballo é a diversión, o xogo e unha visión do mundo moi persoal.

Mostrará a súa destreza (ou non) con elementos que van aparecendo da súa maleta: pelotas, un prato chinés, fachos de lume e o clásico tartazo reinventado ao máis puro estilo deste irreverente pallaso internacional.

Abracadaver é un espectáculo de circo terrorificamente divertido. Unha terapia de choque para partirse de risa e desfacerse dos medos, unha oportunidade para vivir a experiencia do teatro en familia. En definitiva, un divertidísimo show de rúa para todos os públicos. A través de Rogelio, un entrañable personaxe de ficción ao que dá vida o actor Dani Blanco, AsSircópatas preséntannos esta delirante proposta chea de sustos e bo humor. Clown, malabares, escapismo, rulo, acordeón, serrucho... todo á disposición dun actor preparado para levar a cabo o seu Abracadaver.

Obra de teatro-circo que narra en clave de traxicomedia a historia dun antigo circo do século pasado, “O Circo Cambuche”

  Kike Castro, o derradeiro supervivente deste vello circo, lembra no presente a historia da súa familia de funambulistas e o seu amargo final.

  Tódolos domingos pola tarde, o noso protagonista visita a vella carpa da familia e alí, embriagado polas lembranzas do circo, xoga, maquillase e fantasea actuando para un público imaxinario