Espazos Sonoros

A xornada comezará de mañá para percorrer diferentes elementos do patrimonio arqueolóxico da zona. O percorrido sairá da aldea de Bermún, situada sobre o castro que leva o seu nome. Visitarase a cova de Bermún e farase un percorrido duns catro quilómetros ata o castro defensivo de Formigueiros, un asentamento da Idade de Ferro que foi escavado recentemente e no que se atoparon varias inscricións sobre lousas de xisto.

PER-SONAT é un proxecto fundado en 2008 baixo a dirección artística de Sabine Lutzenberg, unha das figuras máis relevantes da actualidade no  eido da interpretación vocal de música antiga. Este conxunto está especializado na interpretación e investigación da música medieval e do Renacemento e, xunto coa súa directora, nel participan algúns dos máis destacados protagonistas da escena actual no ámbito da interpretación historicamente informada.

A construción de instrumentos musicais constitúe un traballo artesanal de elevada complexidade e especialización, nomeadamente cando se trata de recuperar instrumentos que foron empregados outrora para a interpretación de música. En Galicia existe unha crecente industria artesanal dedicada á luthería e á construción de instrumentos antigos e tradicionais, e obradoiros que subministran a músicos de todo o mundo. 

Subida ao miradoiro da Frouseira, na parroquia de Santa Cilla do Valadouro, lugar no que resistiu durante tres anos ao asedio dos exércitos dos Reis Católicos o mariscal Pardo de Cela. A visita enténdese como unha aproximación á figura do mito e a un dos episodios máis relevantes e decisivos da historia de Galicia, acontecido no século XV. A fortaleza de Pena Frouseira, bastión natural case inexpugnable, aséntase sobre un afloramento granítico a unha altura de 429 metros e a súa planta adáptase ás moitas irregularidades do terreo. Actualmente consérvanse escasos restos e en mal estado.

Bitter Fruit é o nome da actuación que a agrupación VIVID Consort leva a Foz no ciclo Espazos Sonoros. O programa combina pezas de música profana inglesa e francesa, coas que o grupo pretende amosar toda a beleza, drama e refinamento da polifonía renacentista, con incursións na música do Quattrocento italiano.

A Casa Grande de Cimadevila será o punto de encontro para unha xornada centrada no escritor Ramón Otero Pedrayo. A xornada comezará cun percorrido literario pola contorna da casa do autor, do que se cumpriron 130 anos do seu nacemento en 2018. De volta na vivenda haberá un xantar conxunto no patio, paseo polos xardíns e visita á propia casa.

Este cuarteto nace coa vontade de difundir a música de cámara, ámbito no que todos os seus membros levan xa máis dunha década traballando. M.Sancho Quartet está liderado pola clarinetista e profesora do Conservatorio Profesional de Música de Vigo Marta Sancho e integrado por instrumentistas profesionais e profesores dos conservatorios profesional e superior de música de Vigo, 

Con base en Amsterdam, a agrupación Capella Sancta Maria destaca pola súa especialización en música do Renacemento. Composto por un cadro internacional de cantantes de primeira liña ás ordes do director coruñés Enrique López-Cortón, os seus programas caracterízanse pola súa contribución á revisión e ampliación dos repertorios vocais dos séculos XV e XVI. 

O Campamento romano de Ciadella é un dos máis importantes conxuntos arqueolóxicos de época romana que se conservan en Galicia. Este campamento militar romano estivo activo entre os séculos II e IV e dispuña de todas as dependencias necesarias para o desenvolvemento das tarefas de adestramento militar e da vida diaria dos seus habitantes, desde os soldados de infantería e cabalería ata os comandos e as súas familias, así como as persoas que desenvolvían diferentes oficios nas ferrerías, curtidoiros ou fornos de pan.

Formado en 2003, Sax Antiqua é un grupo pioneiro pola súa dedicación en exclusiva á interpretación de música barroca arranxada para conxunto de cámara de saxofóns. Integrado por nove saxofonistas profesionais de diversa procedencia, o grupo pretende levar un instrumento moderno, como o saxofón, tradicionalmente asociado á música de jazz, a un ámbito en principio alleo, como é o da música antiga.

Formación

Pablo de Coupau, saxofón soprano

Antonio Felipe, saxofón soprano

Sara Seoane, saxofón soprano

Israel Bajo, saxofón alto