Visita guiada/Roteiro

O Día Internacional da Biblioteca nace en memoria da destrución en 1992 da Biblioteca de Sarajevo, incendiada no conflito balcánico. Neste día inténtase intensificar na opinión pública a importancia das bibliotecas nas comunidades, a súa labor de socialización, de formación, e de convivencia educativa intercultural. Por este motivo as bibliotecas son un lugar de encontro e aprendizaxe, e neste día especial fanse actividades específicas, visitas guiadas e agasállase ós usuarios e visitantes con libros. Un día para aproveitar a coñecer as bibliotecas de proximidade.

O Arquivo do Reino de Galicia lanza o seu ciclo Descubrir o arquivo, unha serie de visitas guiadas ao arquivo. As visitas son de balde, pero antes é preciso inscribirse. Só hai que mandar un correo electrónico ao enderezo arq.reino.galicia@xunta.gal ou chamar ao teléfono 881 960 360. 

A Asociación de Escritoras e Escritores en Lingua Galega, en colaboración co Concello da Coruña, organiza entre setembro e outubro varios roteiros literarios, os Paseos pola Coruña Literaria, que permiten coñecer a cidade da man de diferentes autoras e autores. 

Están dirixidos a maiores de 16 anos e son gratuítos para as persoas interesadas (hai un límite de 55 prazas por paseo). É preciso facer inscrición previa.

Durante o mes de setembro, cada sábado e domingo (excepto o día 23), haberá visitas guiadas tanto ao Castro de Santa Tegra como ao Monte dun modo máis completo. As visitas guiadas ao castro serán ás 11.30, tanto os domingos como os sábados, e terán unha duración de 30 minutos. Visitarase o castro e a vivenda reconstruída. As visitas ao Monte Santa Tegra saíran - os dous días - do Museo Arqueolóxico de Santa Tegra tanto ás 12.30 como ás 17 horas e terán unha duración de 90 minutos. 

O itinerario parte na praza da Quintana nº1, o lugar onde mellor se pode comprender o sentido da viaxe ata Compostela. Desde alí rodéase a catedral descifrando os símbolos que permanecen nos edificios, as rúas e as tradicións da cidade. Lembrarase a visita do interior do templo, recoñecendo os ritos antigos e o sesu significado. Por último, farase o último tramo do Camiño, para recuperar o que a cidade ofrece aos peregrinos e a súa linguaxe secreta de símbolos iniciáticos.

Xosé Lois Vilar será o guía en O Monte Tetón. A paisaxe tatuada, unha andaina en colaboración do Instituto de Estudos Miñoranos (IEM) e que permitirá descubrir os principais petroglifos do Monte Tetón (Portaxes e de Real Seco), dentro do Parque Arqueolóxico do mesmo nome. A antigüidade do conxunto remóntase aos anos 3000-2000 antes de Cristo e o petroglifo de Portaxes é o maior en círculos concéntricos de toda Europa.

A andaina contará con intérprete de lingua de signos e está aberta a todos os públicos. 

O Concello de Arbo organiza a segunda edición da súa andaina infantil, que rematará na Piscina Municipal e que contará cun percorrido curto (1 quilómetro) e longo (5). Haberá un sorteo de agasallos entre os participantes.

Percorrer a provincia de Pontevedra descubríndoa mediante a literatura e a presenza que nela teñen as súas diferentes localidades é posible. Un programa de roteiros seguirá a diferentes autores, diferentes libros e diferentes historias por diversas localidades da provincia, guiados á súa vez por escritoras e escritores galegos contemporáneos. 

Unha nova forma de descubrir o Gaiás e a propia cidade de Santiago de Compostela: Camiño ao Gaiás ofrece novas rutas para chegar a pé ao complexo deseñado por Peter Eisenman, poñendo en valor a fermosa contorna natural e patrimonial que leva ata a Cidade da Cultura, permitindo descubrir algunhas das xoias arquitectónicas de Compostela, xa que se parte do centro histórico.

Organizadas polo Museo Casa da Troia, estas visitas teatralizadas - que comezan na praza do Toural - percorren as rúas e prazas do centro histórico de Santiago de Compostela, para rematar na Casa da Troia, que tamén é visitada. Casimiro Barcala, un dos estudantes protagonistas da novela La casa de la Troya, de Alejandro Pérez Lugín, un best-seller de comezos do século XX, é o encargado de guiar aos visitantes pola cidade e de desvelar os seus misterios. O percorrido segue os escenarios que protagonizan a novela.