Teatro

O amparo dos paraugas, brincar nas pozas e charcos, o divertido da choiva... todo o que é causa dela e que tanto nos gusta: a herba, as árbores, flores, as hortas, alimentos, as paisaxes verdes, etc. Dúas personaxes que ensinan ao público con xogos, bailes e enredos que cantidade de cousas nos trae a choiva, antes e despois de que ela veña ou marche. 

Espectáculo feito para a primeira infancia respectando os seus estímulos, tempos e xeitos de asimilación, duración e achegamento aos elementos empregados na representación.

Elenco: Ezra Morenos e Marcos PTT Carballido

O retrete de Dorian Gray mestura neste espectáculo varios dos seus números curtos. Sete anos de manipulación máxica, de globos, de virtuosismo coas súas mans. Unha delicatessen para os sentidos

Esta historia sobre porqué os merlos ao cantar semellan dicir “rei, rei” foi escrita por Karel Kapeck poñéndose no lugar dos máis desfavorecidos socialmente. Neste espectáculo investígase sobre a técnica  tradicional dos títeres de luva e recupérase a súa frescura e rebeldía.

Palabras sinxelas, cristalinas e situacións transparentes. É unha peza fragmentaria, constituída de secuencias ás veces dialogadas, ás veces silenciosas. Xestos comúns e sen sentido común. Dulce de leche é sentir, gustar, cheirar, ver e escoitar. Tamén cantamos, bailamos imaxes, poesías e músicas, xogamos historias. Achegámonos aos nenos e ao seu mundo sensorial.

Ingredientes: Un pouco de leite, un pouco de vainilla, azucre e mel. Pero tamén necesitamos dúas bailarinas-actrices, atrezo e cartel.

Unha delicada obra visual e poética para os máis pequenos. A maxia da cor e do instante presente. Nun xardín zen sete bolboretas deixáron as súas cores para pintar o mundo. Outono, inverno, primavera e verán son os escenarios das cousas sinxelas e os seus grandes cambios, porque todos crecemos e transformámonos como lle ocorrerá ao noso protagonista, un verme chamado Cucú.

Dirección e creación: Branca do Barrio
Intérpretes: Esther Velategui e Eva Sanz/Iria Angulo/Esther Aja

O argumento de Cartas de las Golondrinas de Escena Miriñaque baséase na íntima correspondencia real que os emigrantes españois mantiveron coas súas raíces e as súas xentes desde países concretos como Arxentina e Uruguai e explora as motivacións e vicisitudes destes. En paralelo investiga as similitudes cos contemporáneos inmigrantes no noso país agora territorio de Europa. Cartas e relatos persoais, descubrimento do estranxeiro, de outro, do outro e tamén relatos da separación e da nostalxia.

Autor e director: José Prieto

Celso Parada, Merce Castro, Avelino González, Iolanda Muíños, Federico Pérez

Sinopse: En plena campaña electoral, coas enquisas vaticinando a derrota electoral do seu partido, o presidente do goberno e os seus asesores  deciden tomar unha iniciativa desesperada: o Presidente visitará persoalmente ós votantes nas súas casas para convencelos de que o voten. 

Autor e director: Cándido Pazó

Elenco: Artur Trillo e Toño Casais

Sinopse: Dúas persoas moi distintas coinciden, casualmente, como curiosos espectadores da demolición dun gran edificio que, despois de anos e anos de litixios e demoras, ten que ser derrubado por mandato xudicial. Na medida en que entre elas dúas se vai establecendo unha insospeitada relación, asistimos a un espectáculo que fala do que todo o mundo fala. Demoledoramente divertido. Demoledoramente humano.

Pepe Capelán é un rapaz da aldea. Acostumado a vivir rodeado de leiras, vacas e tractores, non estaba preparado para o que esperaba: o salto á gran cidade. Cambiou os velorios polas compras nas grandes superficies comerciais, os patróns da aldea polos yonkis dos barrios marxinais da Coruña, e as verbenas polas tardes de sábado nas discotecas. Todo isto e moito máis en "Contos dun rapaz de aldea".

Peer Gynt é un mozo fantasioso, aventureiro e un pouco preguiceiro que quere marchar da aldea na que vive para facerse rico e converterse no Rei do Mundo.

A súa nai Aase, farta das queixas que lle dan de Peer Gynt os veciños, e a súa paciente noiva, Solveig, queren refrear as  súas ansias de aventura …  sen moito éxito.

Só a través duns  estraños  soños  Peer Gynt acada a comprender  cas  súas ambiciosas intencións  non lle traerán máis ca problemas  e finalmente  decide quedar coa fermosa Solveig na aldea para sempre.