Evento: Zweisamkeit

Cedemos o espazo para esta exposición organizada por José Manuel Pérez Pena. Para referirse á soidade, en alemán a palabra máis común é Einsamkeit. E do mesmo xeito que sucede coa nosa soidade, aquel termo pode ter significados tanto positivos (no caso dunha soidade buscada) como negativos (caso contrario). Pero en alemán tamén existe outro termo, para o que non temos un equivalente galego, a saber, Zweisamkeit (unha especie de soidade compartida) que sempre conleva emocións positivas.

Un haiku e unha fotografía poden ter moito en común, pois un haiku clásico case sempre é un poema descritivo. Os hajins denominan aware aquela emoción que lles provoca unha visión repentina. Emoción que logo intentan fixar por escrito nun haiku. Esa emoción non difire moito da que sinte un fotógrafo ou unha fotógrafa cando dispara unha foto determinada durante unha deriva fotográfica.

Pode visitarse no vestíbulo do 23 de febreiro ao 27 de marzo durante a apertura da biblioteca.