Evento: Arqueoloxía en Monodose

Tras a boa acollida deste ciclo nos meses anteriores, no mes de novembro o MAPOUR continúa co ciclo de "Arqueoloxía en monodose", para descubrir novas propostas e coñecer mellor o noso patrimonio.

Nesta ocasión, José María Eguileta Franco será o relator de "Sepulturas no Ourense tardorromano". Na cidade houbo intervencións arqueolóxicas esenciais para axudar a comprender a orixe do Ourense romano, propiciando hipóteses tanto da cronoloxía como da extensión no núcleo. Foi o caso das Burgas, do Museo Arqueolóxico, da Praza da Madalena, do Pompeo ou do Posío. Co incremento das escavacións foron aparecendo sartegos romanos distribuídos pola cidade, polo momento todos tardíos, que poden contribuír a comprender a evolución do tecido urbano cara á Tardoantigüidade.

José María Eguileta é doutor en Historia pola USC, con premio extraordinario; membro de Número da Real Academia Galega de Belas Artes, e o xefe do Departamento de Arqueoloxía do Concello de Ourense.

A conferencia terá lugar no Centro Cultural Marcos Valcárcel, rúa do Progreso, 30. Ourense

O mes de novembro complétase coas seguintes ponencias:

3 de novembro: Escavacións no patio das Josefinas e xardín do Posío, por Luis Orero Grandal

4 de novembro: Visita guiada ao cemiterio de San Francisco, por Afonso Vázquez-Monxardín Fernández

17 de novembro: Arte parietal megalítica en Galicia, por Fernando Carrera Ramírez.

24 de novembro: Escavacións no Museo Arqueolóxico Provincial, por Francisco Fariña Busto.