Evento: Mañás poéticas

Terceira sesión das Mañás poéticas, actividade coordinada por Carlos Arias - voluntario do programa de Voluntariado Cultural da Rede de Bibliotecas de Galicia - para achegar a poesía ás persoas interesadas.

Nestas sesións, que teñen lugar os últimos mércores de cada mes, faise unha lectura libre de textos dunha poeta e un diálogo aberto sobre as impresións da lectura.

A entrada é libre ata un máximo de 15 participantes.

Yolanda Castaño (Santiago de Compostela, 1977) é poeta, filóloga, videocreadora e unha activa e premiada dinamizadora cultural que, dende 2009, dirixe obradoiros literarios, obradoiros internacionais de tradución poética, festivais e ciclos mensuais de poesía sempre con autores/as galegos/as e internacionais. 

Premio Nacional da Crítica 1999, Premio Espiral Maior 2007, Premio Ojo Crítico 2009 (Profundidade de campo), Premio Fundación Novacaixagalicia (A segunda lingua), Premio Irmandade do Libro “Autora do Ano” 2014 e Premio Nacional de Poesía (Materia), conta con sete poemarios individuais, edicións bilingües (galego-castelán) en Visor Libros –para España e Latinoamérica–, libros publicados en italiano e francés, plaquettes editadas en alemán, macedonio, francés, croata e chinés, varias antoloxías -unha delas en cómic poético- e cinco libros de poesía infantil, ademais doutras obras publicadas como editora ou tradutora de poetas contemporáneos. 
Traballou durante anos en TV (Premio Mestre Mateo da Academia Galega do Audiovisual) e recibiu as bolsas de Escritora en Residencia en Rodas (Grecia), Múnic, Beijing e Escocia. Con máis de 30 anos de traxectoria na poesía, desenvolve experiencias que fusionan a escrita coa plástica, música, performance, danza, audiovisual, cómic ou mesmo coa cociña, xa sexa soa ou en colaboración con outros/as artistas.

A súa obra apareceu representada en multitude de revistas, libros colectivos e antoloxías, así como en numerosos encontros e festivais de Europa, América, Norte de África e Asia. A súa obra está traducida a máis de 25 idiomas.

Contos de fadas
Érase unha vez
...e ao final do conto
A carapuchiña era unha loba,
A avoíña un leñador,
A devoradora unha asceta,
A libérrima un completo compendio de dependencias,
A mística unha frívola tinguida de temores,
o incomprendido un anxo,
a princesa un monstro,
a frívola unha mística tinguida de temores,
o monstro unha princesa,
o outro incomprendido un demo,
a suposta loba unha absoluta carapuchiña,
e o camiño entre o bosque
un leñador.