Festa de interese turístico

O que non é máis que un traballo gandeiro rutineiro, a rapa de crinas e colas, a desparasitación dos cabalos e a marcaxe a ferro dos poldros nados no último ano, convértese en Galicia nun espectáculo e nunha romaría multitudinaria. Nas zonas onde se crían os cabalos en liberdade, como é o caso de Boimente, os curros ou rapas das bestas atraen cada ano numeroso público ávido de emocións. O de Candaoso, nunha paraxe desde a que se divisa a ría de Viveiro, illa Coelleira e Estaca de Bares, é un dos máis sonadas de Galicia.

Entre todos os curros ou rapas das bestas que teñen lugar en Galicia durante o verán, o de Sabucedo destaca por conservar a pureza da tradición. Este é o único curro no que os aloitadores se enfrontan cos cabalos de igual a igual, sen cordas nin paus, para inmobilizalos e raparlles as crinas. Mozos e mozas da parroquia inícianse cada ano nunha tradición centenaria que levan no sangue, un xeito de entender a vida en comuñón cos cabalos.

A Festa da Lagosta celébrase de modo ininterrompido dende o ano 1991 e dende o ano 2000 incluíu tamén unha mostra da gastronomía local con novos mariscos e moluscos polo que pasou a denominarse Festa da Lagosta e da Cociña Mariñeira da Guarda.

É na parroquia de Carnés, en Vimianzo onde se celebra cada 9 de xullo, véspera de San Cristovo, esta festa con catro séculos de historia na honra do seu patrón. A súa orixe foi unha comida de membros da Confraría de San Cristovo, creada en 1608, que, co tempo, se transformou nun xantar para os pobres e desde o ano 1981, que se retomou de xeito ininterrompido, nunha festa gastronómica dedicada aos callos.

Para atopar as orixes das feiras de Paiosaco temos que remontarnos á Idade Media. Co tempo, a máis importantes delas foi coñecida como Feira das Cereixas. As orixes desta singular celebración, a máis importante das festas gastronómicas que se realizan no Concello da Laracha, atopámolas en décadas pasadas, cando a produción das cereixas tiña unha grande importancia especialmente na zona do val do Anllóns.

Un dos produtos máis internacionais da gastronomía ourensá é o pan de Cea, que se elabora seguindo unha antiga receita en fornos artesanais en todo o concello, e que conta, como é corrente en Galicia, coa súa propia festa de exaltación, o primeiro domingo de xullo. 

Desde a ermida do Santo Hadrián do Mar divísanse as illas Sisargas, un refuxio natural para as gaivotas e os corvos mariños. Esta paisaxe singular da Costa da Morte imprime a esta romaría un incentivo engadido xa que a pequena capela do século XVI está situada no cabo Santo Hadrián. Ata aquí teñen que subir os infatigables romeiros co santo aos ombros desde a igrexa parroquial de San Xulián en Malpica. Ao amencer, tras o anuncio dos fogos e bombas de palenque, comeza un inesquecible percorrido de cinco quilómetros que pasa por camiños e praias.

Se hai un lugar no que a Noite de San Xoán se vive entusiastamente ese é A Coruña, onde a noite máis curta do ano vai precedida de toda unha semana de actos preparativos. Desde a mañá anúnciase a festa con desfiles de bandas e carrozas de meigas para que a queima da fogueira volva ser un momento máxico e inigualable no calendario anual. O cheiro das sardiñas asadas e do lume envade a cidade a noite do 23 de xuño. Moita xente participa neste rito ancestral de culto ao lume co que se celebra a entrada do verán.

Trátase dun evento singular dedicado á rosa de Quirós, presente nas insignias representativas do concello. Esta festa é o centro dunha ampla variedade de actos culturais e lúdicos, en que se combina a tradición e a música e nos cales participan asociacións culturais e veciñais.

Comezan as celebracións o 13 de xuño coa celebración da festa infantil, continuando o día 14 de xuño co día grande da festa da rosa.

En Lugo ten lugar unha das cerimonias máis lonxevas da tradición popular e relixiosa galega. A Catedral lucense ten o privilexio de ter exposto de forma permanente o Santísimo Sacramento (de aí o caliz e a ostia que aparecen no escudo da cidade) e dende fai máis de tres séculos a cidade réndelle homenaxe cun solemne acto institucional.