No 28 de marzo de 1809, un levantamento popular permitiu recuperar Vigo da ocupación das tropas napoleónicas. Máis de 1.400 soldados imperiais foron feitos prisioneiros. E, desde a vila olívica, organizouse despois unha ofensiva en toda Galicia que levou á retirada definitiva do exército de Napoleón.
Este feito histórico, que os vigueses conmemoran como "A Reconquista", tivo gran transcendencia e por iso Vigo obtivo título de "cidade", concedido pola Rexencia.
O recinto feiral, na praza do Concello, énchese da música da banda de música de Sober, unha das máis antigas de Galicia, con 130 anos de historia, e un dos símbolos desta localidade luguesa, para amenizar este grande encontro en torno ao viño de Amandi (subzona da D.O. Ribeira Sacra). A cita serve, ademais, como escusa para amosar a contorna da zona e o seu modo de vida, centrado na viticultura pero tamén na olaría, coa veciña parroquia de Gundivós como produtora.
Organizado pola Asociación Cultural Meiro, ten lugar unha feira gastronómica que é a culminación dun traballo que abrangue todo o ano e que ten por obxecto a recuperación etnográfica, educativa, cultural e gastronómica do millo corvo. É esta unha variedade de millo de cor negra, case extinguida na comarca do Morrazo, que se fai coa participación de asociacións e centros educativos.
A abundancia de ourizos nas súas augas converte ao concello de Cervo na capital galega do ourizo, máis aínda desde que naceu en 1992, na parroquia de San Cibrao, unha festa gastronómica para dar a coñecer este produto e promocionar a riqueza cultural, paisaxística e gastronómica do lugar.
Arraigada no corazón da poboación de Ferrol desde hai máis de 100 anos, na Festa das Pepidas homenaxéase a todas as mulleres da cidade a través das rondas. Numerosas agrupacións musicais da cidade e a súa comarca participan nesta celebración con valses, danzas e habaneiras, que soan a través dos seus laúdes, mandolinas ou bandurrias.
A vila de Baiona foi o primeiro lugar do Vello Continente en coñecer a existencia dun novo mundo. En 1493 desembarcou nela Martín Pinzón, ao mando da carabela Pinta, coa noticia da existencia doutro mundo e as probas que o corroboraban. En recordo daquel feito histórico, todos os anos ten lugar na praia unha dramatización que comeza co desembarco de Pinzón e a súa maltreita tripulación, cun par de indíxenas traídos das novas terras e produtos alimenticios descoñecidos ata entón nestas latitudes que darían credibilidade ás fabulosas novas do acompañante de Colón naquela xesta.
A Festa do Queixo presenta este ano un festival cunha ampla e variada programación. 3 DÍAS de música para celebrar o 40º aniversario. Todos os concertos serán DE BALDE e terán lugar no campo da feira de Arzúa.
Cada domingo seguinte ao Domingo de Entroido, a vila de Cuntis celebra unha festa que combina a exaltación da gastronomía típica do inverno cos últimos días do Entroido, que nesta localidade pontevedresa simboliza o Enterro do Chapante.
A Festa do Lacón con Grelos de Cuntis é por iso algo máis que a posta en valor dun produto gastronómico, o lacón, galego por excelencia, que procede das extremidades dianteiras do porco. Desde os seus inicios, en 1998, serve para promocionar o seu rico patrimonio cultural e natural.
As xentes de Lestedo, a uns 15 quilómetros de Santiago de Compostela, resístense a rematar o Entroido, e o domingo de Piñata (o seguinte ao martes de Entroido) celebran a Festa da Filloa. O obxectivo que perseguen desde o ano 1984 é popularizar unha das sobremesas máis tradicionais de Galicia, que nas datas de Entroido cobra especial protagonismo nas casas e nos restaurantes.
A androlla é un embutido típico da comarca de Viana, que se fai en tripa gorda, afumada como un chourizo, e reenchida de costela de porco tallada e adobada con carne, todo sazonado con sal, pemento doce e picante e un pouco de allo. Necesita afumarse durante dez días e secarse durante uns dous meses antes de estar lista para cociñar.
