Festa de interese turístico

A Festa do Carneiro ao Espeto pon o punto final ás festas de Moraña. O escenario é a carballeira de Santa Lucía. Aquí ásanse ao estilo pampeiro (abertos en canal e con lume de leña), preto de douscentos carneiros. Non se venden racións, senón carneiros enteiros, polo que é unha festa gastronómica na que participan grandes grupos de amigos, previa reserva de mesa (20-30 persoas) e lote de comida (un carneiro, dúas empanadas de zorza e bacallau, pan, un garrafón de viño do país e café).

As Fragas do Eume ben merecen unha visita en calquera época do ano pola beleza das paisaxes que traza o río encaixado entre frondosas e empinadas ladeiras. Para moitos especialistas, trátase do único exemplo de bosque atlántico que permanece en Europa e contan que o mesmo Lord Byron ficou namorado da paisaxe ao coñecer o lugar no que os monxes beneditinos instalaron o mosteiro de Caaveiro.

Máis do 50 por cento das capturas que chegan ao porto pesqueiro de Celeiro, un dos máis importantes de Galicia, son de pescada, polo que non é de estrañar que este produto sexa o protagonista dunha festa gastronómica que recibe a milleiros de visitantes a fin de semana anterior ao 25 de xullo. Dende finais dos 90, a lonxa vella do porto acolle a degustación deste exquisito peixe branco pescado de xeito tradicional ao anzol. Máis de 2.000 racións repártense nesta importante cita gastronómica da Mariña Occidental, na que non falta a música e a tradicional queimada.

A capital galega celebra as súas maiores festas na segunda quincena de xullo, cun programa que combina festivais de folclore galego ou de música clásica (Festival Internacional de Música de Galicia) con cine ao ar libre, concertos de gran formato, pequenos concertos, orquestras, teatro de rúa, teatro de sala, animación na rúa, programación infantil, charangas, humor, danza...

Moito antes de que Fernando Alonso nos contaxiara co andazo da velocidade a catro rodas, os veciños da parroquia de Esteiro, no municipio coruñés de Muros, organizaban xa o seu “Gran Prix” de carrilanas. A que fora unha das principais diversións dos nenos da posguerra, as baixadas vertixinosas sobre unha plataforma de madeira montada sobre catro caixas de bolas, adquire nesta localidade a categoría de deporte artesanal (que hai quen cataloga entre os denominados “deportes de inercia”).

Simpática e disparatada. Así é esta festa que ten a súa orixe en 1948, froito do sentido do humor dun grupo de amigos que responderon con moita graza a unha iniciativa da Comandancia de Mariña de Vilagarcía de Arousa de rifar, co gallo das festas do Carme (patroa dos mariñeiros), unha embarcación tipo dorna, tradicional da zona. Estes amigos dixeron que lles tocara a dorna a eles e convocaron o pobo á súa botadura. Apareceron cunha maqueta de 50 centímetros e unha botella de auga destilada e bautizaron a embarcación como “Virgen del Carmen”.

A Festa do Percebe do Roncudo celébrase na primeira quincena do mes de xullo no concello de Ponteceso (A Coruña). É unha celebración que comezou hai 22 anos e foi a primeira festa do percebe que se celebrou en España.

Declarada Festa de Interese Turístico de Galicia en 2004, a festa do Santísimo Cristo dos Aflixidos de Bouzas conta cun grande arraigo popular no seu contorno. Durante cinco días celébranse distintos actos, entre os que destacan o pregón, a regata internacional de faluchos (embarcacións tradicionais de vela latina), a procesión e o Festival Poético Piro-Musical "Cidade de Vigo - Vila de Bouzas", que adoita retransmitir en directo Televisión de Galicia. Verbenas, concursos de redacción e pintura e torneos deportivos completan a programación festiva.

A singularidade da Festa da Vieira baséase en que se trata da única festa de exaltación deste molusco que se comercializa no porto de Tragove. Esta festa de exaltación gastronómica conta, ademais, cun amplo carácter participativo porque está organizada por numerosas asociacións. Cada ano recibe ademais un número de visitantes que supera os cincuenta mil.

É na parroquia de Carnés, en Vimianzo onde se celebra cada 9 de xullo, véspera de San Cristovo, esta festa con catro séculos de historia na honra do seu patrón. A súa orixe foi unha comida de membros da Confraría de San Cristovo, creada en 1608, que, co tempo, se transformou nun xantar para os pobres e desde o ano 1981, que se retomou de xeito ininterrompido, nunha festa gastronómica dedicada aos callos.