Todos os que se acheguen ao concello do Pino a primeira fin de semana de agosto atoparanse con tres festas nunha soa. É a Festa do Galo piñeiro, coa que se pretende recuperar e pór en valor esta especie orixinaria do Pino, mais inclúe unha Mostra cabalar e, nas súas últimas edicións, unha Festa Celta coa finalidade de ambientar as rúas naquela civilización que introduciu o galo piñeiro en Galicia.
Á sombra das árbores e dos toldos, a bordo de orixinais embarcacións, engalanadas para a ocasión con banderíns, grilandas e farois, grupos de mozos e mozas amenizan coa súa troula –comida e viño a esgallo– a romaría no Campo dos Caneiros, na parte alta do río Mandeo. A navegación polo tramo que separa o núcleo de Betanzos desta parte alta do río é unha auténtica troula, chea de colorido e de bo humor. O embarque, animado con música de charanga, faise no Paseo da Tolerancia.
Organizada pola asociación cultural “Airiños do Xunco”, a Queimada Popular de Cervo reúne na vila arredor de 7.000 persoas. A praza do Souto é o escenario onde ten lugar a preparación da queimada (bebida a base de augardente e azucre), cun bruxo vestido de palla encargado de pronunciar o esconxuro e escorrentar os malos espíritos.
Trátase dun festival folclórico popular e festa gastronómica que se coñece como “A XIRA” que se vén celebrando todos os anos desde 1965 o primeiro domingo de agosto, aínda que con anterioridade xa se celebraba sen data fixa.
Da organización encárgase a Asociación Amigos da Gaita Galega que tamén erixiu no monte de Santa Cruz, lugar de celebración da Romaría e incomparable atalaia desde a que se divisa toda a bisbarra, un monumento ao Gaiteiro aínda único na nosa Comunidade Autónoma.
“Os pementos de Padrón uns pican e outros non”, di o refrán popular. Nada que obxectar por que, malia as distintas teorías existentes, non se pode diferencialos (aquí reside unha parte da graza de comelos). Pero si se pode facer unha puntualización, en xusto recoñecemento ao lugar de procedencia do máis internacional dos produtos desta comarca bañada polo río Ulla: que os afamados y diminutos pementos verdes son, en realidade, de Herbón.
En plena tempada estival, cando a vila mariñeira de Foz ferve de visitantes, teñen lugar as súas festas patronais, repletas de atraccións para todos os públicos. O día grande, dedicado a San Lourenzo, comeza cunha misa cantada polo Coro de Foz e a solemne procesión do santo, coas autoridades municipais á cabeza, acompañada de banda de música. Pola noite, o espectáculo piromusical e acuático concentra a atención do público.
Os habitantes desta parroquia mariñeira non se poñen de acordo sobre o carácter e as verdadeiras intencións da Maruxaina, un personaxe que protagoniza unha das máis remotas lendas galegas e vive nas illas dos Farallóns. Uns din que é unha fermosa ninfa con corpo de muller e cola de peixe que ten envexa das mulleres dos mariñeiros, e por iso co seu sedutor canto atrae os mariñeiros para gozar da súa compañía. Outros manteñen que ela lles avisa dos temporais e que é unha vella bondadosa.
A través desta festa rememórase o ancestral labor da malla de cereais, a actividade na que os agricultores separaban o gran (para destinalo a fariña) da palla (para forraxe dos animais).
A parroquia de San Miguel de Reinante (Barreiros, Lugo) reúne desde 1980 o primeiro sábado de agosto decenas de grupos de danza e música folclórica de Galicia, doutras comunidades autónomas e de todos os continentes, con motivo da celebración do Festival Folclórico Internacional do Emigrante, que organiza a asociación folclórica O Arco da Vella. Coa distinción de Festa de Interese Turístico Galego, que acadou no ano 2007, recoñécese a súa singularidade, o arraigamento e o valor cultural que atinxiu en máis dun cuarto de século de vida.
Desde o ano 1989 celébrase en Valga a Festa da anguía para enxalzar e dar a coñecer un dos peixes máis exquisitos do río Ulla. Pretende mostrar as distintas posibilidades culinarias que este peixe nos pode ofrecer: ano a ano fóronse engadindo novas formas de preparalo, e así na última edición os milleiros de visitantes puideron degustalo en empanada, fritido, guisado con patacas, rebozado, en escabeche ou á Bela Otero (con arroz).
