Festa de interese turístico

Dende a ermida do Santo Hadrián do Mar divísanse as illas Sisargas, un refuxio natural para as gaivotas e os corvos mariños. Esta paisaxe singular da Costa da Morte imprime a esta romaría un incentivo engadido xa que a pequena capela do século XVI está situada no cabo Santo Hadrián. Ata aquí teñen que subir os infatigables romeiros co santo aos ombros dende a igrexa parroquial de San Xulián en Malpica. Ao amencer, tras o anuncio dos fogos e bombas de palenque, comeza un inesquecible percorrido de cinco quilómetros que pasa por camiños e praias.

As rúas céntricas de Ponteareas amañecen o domingo de Corpus tapizadas de espectaculares alfombras florais sobre as que pasará a procesión do Santísimo Sacramento. A tradición, que ten máis de 150 anos de antigüidade, perdura grazas ao tesón dos veciños, que durante a véspera traballan na súa confección. Aínda que tamén son figurativos, a maioría dos deseños son debuxos xeométricos e, en todos os casos, sorprenden pola súa magnitude e o seu colorido. O significado das alfombras, que adoitan ser máis dunha ducia, é profundamente relixioso, xa que se realizan como ofrendas ao Santísimo.

Sigüeiro ten un coto de pesca moi concorrido durante a tempada de pesca e desde o ano 1996 unha festa que enxalza a longa tradición troiteira da localidade. O segundo domingo de maio ten lugar un concurso de pesca e unha degustación gratuíta de troitas que reúne a preto de 30.000 persoas. En torno a estes dous eixes, desenvólvese un programa festivo durante toda a fin de semana, con actuacións de charangas e orquestras, obradoiros infantís e xogos tradicionais. Propostas de ocio para todos os gustos que van desde un Festival Folk ata unha concentración de coches clásicos.

O salmón ponse en valor na Estrada desde 1974 a terceira fin de semana do mes de maio.

O domingo é o día grande desta festa, xa que nesta xornada se celebra a degustación popular que permite a veciños e visitantes gozar das propostas culinarias deseñadas polos hostaleiros locais a prezos accesibles. Asociacións, panadarías e restaurantes presentan todos os anos innovadoras delicias elaboradas co salmón como principal ingrediente.

Melide recende a doce dun xeito moi especial no segundo domingo de maio. A Festa do Melindre e da Repostaría Tradicional da Terra de Melide ten lugar na Praza do Convento, punto onde se concentran os expositores.
Aínda que durante moitos anos se falou da Festa do Melindre, a exaltación estendeuse a toda a repostaría típica e tradicional de Melide e a súa comarca. Son tres os produtos que recollen a esencia da tradición reposteira na zona: o melindre, o rico e o amendoado.

Da Enseada de San Simón procede o choco que todos os anos, na primeira quincena de maio, cobra protagonismo na vila de Redondela. A festa de exaltación deste cefalópodo da ría de Vigo comezou a celebrarse nos anos 80 e nas súas últimas edicións logrou reunir a máis de 30.000 persoas que consumiron 5.000 quilos.
A festa, que coincide na época na que hai máis presenza deste produto, ten como eixo central unha gran carpa situada na Alameda. Aí pódese degustar o choco preparado polos restaurantes da vila  en diversas formas, desde as máis tradicionais ata as máis vangardistas.

Desde 1986, Ares celebra o Corpus Christi coa confección de alfombras florais que ano tras ano son admiradas polos milleiros de visitantes que se achegan á vila mariñeira. Os veciños, perfectamente organizados en seis grupos de traballo, son os artífices desta espectacular obra de arte vexetal á que dedican semanas de esforzo e que acada unha lonxitude de máis dun quilómetro.

Coincidindo coa 55 edición da Feira do Viño do Ribeiro,  realizarase unha visita teatralizada nocturna polo castelo de Ribadavia e as rúas do barrio xudeu, acompañando a personaxes que viviron durante séculos na vila medieval.

A entrada custa 8 euros e o aforo é de 40 persoas. Pode reservarse a entrada    no teléfono 617557961 ou no email turismo@ribadavia.es

Se o Val de Quiroga é unha das poucas zonas de Galicia onde se mantivo o cultivo de oliveiras e a elaboración tradicional do aceite, non é de estrañar que o municipio lugués celebre dende o ano 2000 unha mostra que ofrece a posibilidade de contemplar o proceso íntegro desta elaboración artesanal, así como un espazo de venda deste e doutros produtos típicos da comarca.

Vila de Cruces coñece os segredos do galo de curral, e desde o ano 93 compárteos a través dunha cita gastronómica que inclúe, ademais da degustación popular deste produto, un programa de actividades nos que a música e a cultura son protagonistas. A festa naceu da man do colectivo de criadores de galo Agro, co fin de promocionar un prato elaborado cun produto criado de xeito natural por máis dunha vintena de produtores.