Evento: Mostra itinerante Filgueira Valverde (1906-1996). Un faro na construción de Galicia

A Xosé Filgueira Valverde (Pontevedra, 28 de outubro de 1906 – 13 de setembro de 1996) dedícaselle este ano o Día das Letras Galegas. Home de ampla formación, significouse tamén pola diversidade dos seus intereses intelectuais e a multiplicidade de actividades e iniciativas –docentes, académicas, culturais ou políticas– que puxo en marcha e impulsou.

A súa pegada, sexa a través das súas numerosas publicacións e intervencións públicas (cursos, conferencias, presentacións), sexa por medio das institucións e organismos, públicos e privados, que promoveu ou aos que estivo vinculado (Seminario de Estudos Galegos, Museo de Pontevedra, Instituto de Pontevedra, Instituto de Estudios Gallegos Padre Sarmiento, Alcaldía de Pontevedra, Xunta de Galicia, Consello da Cultura Galega, etc.), permanece viva. Creador literario (de narrativa, teatro, e poesía), promotor e defensor do uso normal da lingua galega, en cuxa normativización tamén traballou intensamente desde moi novo, a súa elección como figura homenaxeada no Día das Letras Galegas do ano 2015 pola Real Academia Galega preséntase, pois, como unha excelente ocasión para achegarse á súa vida e á súa obra, unha e outra inseparables.