Evento: Arqueoloxía en Monodose

Tras a boa acollida deste ciclo nos meses anteriores, no mes de novembro o MAPOUR continúa co ciclo de "Arqueoloxía en monodose", para descubrir novas propostas e coñecer mellor o noso patrimonio.

Nesta ocasión, Fernando Carrera Ramírez estará a cargo da conferencia "Arte parietal megalítica en Galicia, unha breve presentación". Unha primeira ollada sobre a arte parietal conservada nas lousas dos dólmens do Noroeste da Península Ibérica, e as últimas novedades que se teñen producido sobre o seu coñecemento. Tamén se fará fincapé na súa extrema vulnerabilidade e a necesidade dun plan específico de xestión para mellorar o seu estado de conservación.

Fernando Carrera é licenciado en Xeografía e Historia, coa especialidade de Prehistoria, pola UCM, diplomado na Conservación de Materiais Arqueolóxicos pola Escuela Nacional de Conservación y Restauración de Bienes Culturales de Madrid e doutor en Historia pola UNED. Catedrático de Conservación de Materiais Arqueolóxicos na Escola Superior de Conservación de BBCC de Galicia. O seu principal interese profesional sempre foi a conservación de xacementos arqueolóxicos, especialmente daqueles que posúen arte prehistórica.

A conferencia terá lugar no Centro Cultural Marcos Valcárcel, rúa do Progreso, 30. Ourense

O mes de novembro complétase coas seguintes ponencias:

3 de novembro: Escavacións no patio das Josefinas e xardín do Posío, por Luis Orero Grandal

4 de novembro: Visita guiada ao cemiterio de San Francisco, por Afonso Vázquez-Monxardín Fernández

10 de novembro: Sepulturas no Ourense tardorromano, por José María Eguileta Franco

24 de novembro: Escavacións no Museo Arqueolóxico Provincial, por Francisco Fariña Busto e Eduardo Breogán Nieto Muñíz