Evento: O cociñeiro Antón e a pasteleira Tomasa

Celebramos o 17 aniversario da biblioteca co espectáculo e obradoiro O cociñeiro Antón e a pasteleira Tomasa de Teatro Calavera. E unha historia de amor- romántica- dun cociñeiro chamado Antón e unha pasteleira chamada Tomasa. Un día de moita produción o forno de Antón estoupou, pois estaba feito de latón, ea pasteleira Tomasa invitouno a asar mazás no seu forno que é de aluminio ben gordo. Cando Antón probou as mazás asadas cubertas con tanto caramelo da emoción deulle un mareo, berrou, saltou e ao cabo dun pouco... POM! O Cociñeiro Antón esnafrou, e caeu escarranchado, retorto e petrificado. Quedou triste Tomasa e pechou as portas da casa, a Fonte do susto secou a desgusto, a Maceira ao contarllo tirou coas mazás do espanto, o Paxariño foi buscar un lugar máis tranquilo onde facer o seu niño e o Ceo de tanta dor mudou a súa cor. Cando por fin escampou... O pobre Antón acordou! E colorin colorado, estes dous namorados... Bicaron...bicaron... e bicaron.

Despois do conto, realizaremos un obradoiro de cociña de chocolate co público asistente.

No salón de actos. Para 25 nenas e nenos de 3 a 10 anos. Cada unha delas pode vir acompañada dunha persoa adulta. As persoas interesadas deben recoller o convite no mostrador de Información dende 30 minutos antes do comezo da actividade.