Evento: O voo da curuxa de Minerva

Dende 2002 a UNESCO vén celebrando o Día da Filosofía cada terceiro xoves de novembro, polo que neste 2024 terá lugar o día 21. Esta data está pensada para subliñar a relevancia da Filosofía no desenvolvemento humano como disciplina e mesmo como acto da vida cotiá que ten como obxectivo promover o pensamento crítico.

Na Biblioteca Ánxel Casal queremos achegar o noso grao de area a esta conmemoración cunha selección de obras pensadas para comezar a mergullarse na apaixonante aventura do pensamento humano. E conscientes da dificultade que entraña un campo vasto e descoñecido como é a Filosofía, propoñemos un espazo de encontro e diálogo coa súa irmá xemelga, a Literatura.

Por esa razón, elaboramos unha escolma de obras de autores diversos, que abrangue desde os inicios da Literatura moderna, no século XVII, ata a contemporaneidade. Diversidade que é patente na variedade de xéneros e subxéneros presentes, países, rexións, culturas e linguas de orixe para intentar entender o momento que estamos a vivir.

Pretendemos con esta mostra un recuncho de reflexión lonxe do asoballamento imposto polo tráfego moderno, un refuxio que mesture o poder das ideas filosóficas co xenuíno pracer da lectura. Porque o certo é que Filosofía e Literatura converxen no seu interese polas mesmas cuestións imperecedoiras: o temor (e mesmo a vertixe) ante a soidade, a resistencia triunfante ou a transixencia derrotada ás convencións sociais, a crítica ao poder político, a fragmentación da subxectividade e o eu, a esperanza dun mundo mellor… ou a admonición contra outro aínda peor.

Todo iso e moito máis xorde co “Voo da curuxa de Minerva”, que, como escribira Hegel fai dous séculos, comeza só no crepúsculo. E aínda así, o saber crepuscular é outra forma máis do saber.

Pode visitarse no 2º andar ao longo do mes de novembro no horario de apertura da biblioteca.