Evento: O escultor Francisco Asorey

Cedemos o espazo á Agrupación Cultural O Galo para realizar a palestra "O escultor Francisco Asorey" e a explicación in situ do monumento a San Fancisco a cargo da profesora doutora Maribel Iglesias Baldomero.

En primeiro lugar, fará un percorrido pola produción do escultor cambadés e a continuación, explicará o monumento a San Francisco diante da propia escultura, unha das máis significativas do artista, situada a uns 80 metros da biblioteca Ánxel Casal.

Maribel Iglesias Baldomero nace en Caracas en 1964, filla de emigrantes galegos que instálanse en Santiago cando volven. Licénciase en Xeografía e Historia e primeiro traballa no IES Ramón Cabanillas de Cambados. Logo de aprobar as oposicións a profesora de secundaria, consegue o destino definitivo no IES Francisco Asorey desa vila.

É unha das estudosas que mellor coñece ao escultor Francisco Asorey, feito que se aprecia no seu estudo Francisco Asorey, escultor galego, editado a partir da súa tese de Doutoramento, defendida na USC en 2016.

Interésalle a historia local e difundila entre o seu alumnado: ir do particular ao universal. Dentro desta liña atópase Cambados, 100 anos de historia a través da fotografía (2005), un traballo que realizou xunto ao alumnado e compañeiras e compañeiros do centro educativo e que obtivo un premio á innovación educativa da Xunta de Galicia. A este seguíronlle os libros Ramón Cabanillas, Biografía en imaxes (2008), polo que acadou o IX Premio Cabanillas. A súa última publicación, Pazo de Fefiñáns. Historia e Arte (2021), tamén responde á súa teima de espallar o patrimonio de Cambados, contribuíndo deste xeito a que este se respecte, active e conserve.

No salón de actos. A entrada é libre ata completar a capacidade da sala.