Evento: Mes mundial do Alzheimer

Proclamado pola Organización Mundial da Saúde, o 21 de setembro conmemórase o Día Mundial do Alzheimer, afección mental considerada un desafío crucial para a saúde pública no século XXI. Desde o ano 2012 a Federación Internacional do Alzheimer estendeu dita conmemoración a todo o mes, cumpríndose este ano o duodécimo aniversario do Mes Mundial do Alzheimer, enfermidade neurolóxica que, segundo datos da Sociedade Española de Neuroloxía, actualmente padecen unhas 800.000 persoas en España.

Co Mes Mundial do Alzheimer, preténdese levar a cabo unha campaña internacional para concienciar sobre a demencia e facer fronte ao estigma que acarrea. O tema central da campaña deste ano, “Nunca é demasiado pronto. Nunca é demasiado tarde”, está centrado nos factores de risco e no papel fundamental que desempeña a súa redución para evitar, retrasar ou mesmo previr estas patoloxías neurodexenerativas. Cada ano, as asociacións de Alzheimer e de demencia, así como todas as persoas que participan no tratamento, a atención e o apoio aos pacientes, unen as súas forzas en todo o mundo para organizar actos de concienciación e información, co propósito de promover unha mellor comprensión da enfermidade que sirva para reducir o impacto da demencia nas persoas, as familias e a sociedade no seu conxunto.

A Biblioteca Ánxel Casal quere participar nesta conmemoración presentado unha selección de libros de narrativa, cómics, libros informativos e películas sobre o Alzheimer que atoparedes para a súa consulta e préstamo no segundo andar. A mostra pode visitarse durante o horario de apertura da biblioteca.