Nova: Remata a primeira fase de reunións dos grupos de traballo para a elaboración da Estratexia da Cultura Galega 2021

19/07/2018

Remata a primeira fase de reunións dos grupos de traballo para a elaboración da Estratexia da Cultura Galega 2021

O grupo de traballo do audiovisual propón esta tarde as liñas e obxectivos a fixar na que será a primeira folla de ruta para a política cultural do Goberno galego

Desde o 4 de xullo realizáronse encontros sectoriais dos ámbitos da música, artes plásticas, institucións da memoria, libro, patrimonio cultural e artes escénicas

A Consellería de Cultura e Educación tamén ten habilitada unha canle en liña, accesible en http://www.cultura.gal/gl/estratexia-cultura-galega-2021, para que as persoas interesadas poidan enviar as súas achegas

Santiago de Compostela, 19 de xullo de 2018.- A Consellería de Cultura, Educación e Ordenación Universitaria remata hoxe a primeira fase de reunións dos grupos de traballo que están a participar na elaboración da Estratexia da Cultura Galega 2021. Durante esta tarde, o grupo do ámbito audiovisual reunirase na Cidade da Cultura de Galicia para propoñer as liñas de actuación e os obxectivos para o sector no marco da que será a primeira folla de ruta da política cultural galega.

O secretario xeral de Cultura, Anxo Lorenzo, e o director da Axencia Galega das Industrias Culturais, Jacobo Sutil, presidirán a reunión, na que participarán representantes das principais entidades e empresas audiovisuais de Galicia, entre elas, o Clúster Audiovisual Galego, a Academia Galega do Audiovisual, a Asociación Galega de Produtoras Independentes, a Asociación de Actores e Actrices de Galicia, o Centro Galego de Artes de Imaxe, a Corporación Radio e Televisión de Galicia, a Asociación Galega de Guionistas, a Asociación de Profesionais da Dirección e da Realización de Galicia (CREA), Vaca Films, CTV, Ficción Producciones, Zeitum Films e Agallas Films.
 

Definición de liñas de actuación e obxectivos

Os grupos de traballo da ECG21 organízanse arredor do libro, do audiovisual, das artes escénicas, da música (nas vertentes de difusión da cultura e da industria musical), das artes plásticas e visuais, do patrimonio cultural, das institucións da memoria e da Cidade da Cultura de Galicia. Desde o pasado día 4 de xullo, profesionais dos diferentes sectores participaron nas reunións de traballo para propoñer as principais liñas de actuación e obxectivos de cada un dos ámbitos nos que se artella a ECG21.

Logo destas primeiras xuntanzas, ademais de recoller as observacións formuladas, abriuse un prazo para a remisión de propostas por correo electrónico. A continuación, na seguinte fase, que terá lugar despois do mes de agosto, os membros dos diferentes grupos de traballo volveranse reunir para propoñer as medidas concretas coas que avanzar na consecución dos obxectivos establecidos.
 

Plataforma en liña para a participación cidadá

Canda as achegas dos grupos de traballo, a Consellería de Cultura e Educación puxo en marcha unha canle en liña para favorecer a participación cidadá no proceso de elaboración da ECG 2021, accesible en http://www.cultura.gal/gl/estratexia-cultura-galega-2021. Con este fin, as persoas interesadas poden enviar as súas achegas a través dun formulario electrónico.
 

Fase de exposición pública

Unha vez redactado o documento de traballo da ECG21, levarase a cabo a exposición pública da proposta a través das canles en liña da Xunta de Galicia, fase na que se poderán presentar comentarios, suxestións e alegacións co fin de contribuír a mellorar o documento. Posteriormente, elaborarase o documento final, que se presentará no Consello da Xunta de Galicia. Finalmente, a ECG21 seralle remitida ao Parlamento de Galicia