Nova: A Xunta e Afundación clausuran “Lugo no tempo” con 4.000 visitantes que coñeceron mellor a historia da súa cidade grazas a esta exposición
31/05/2023
A Xunta e Afundación clausuran “Lugo no tempo” con 4.000 visitantes que coñeceron mellor a historia da súa cidade grazas a esta exposición
A exposición, que pechou as súas portas o pasado sábado en Afundación, recibiu a visita de máis dun milleiro de escolares a través do seu programa didáctico
Comisariada por Manuel Gago, e con Marica Campo como coordinadora, reuniu obras de arte, fotografías, documentación histórica e obxectos cargados de simbolismo
Esta foi a terceira das sete propostas do proxecto ‘Cidades no tempo’, que tras pasar por Santiago, Ferrol e Lugo suma en total 15.000 visitantes
Comisariada por Manuel Gago e co asesoramento da escritora lucense Marica Campo, a mostra abordou o pasado e presente de Lugo desde distintas perspectivas como son a economía, a creación artística, a estética urbanística, o entretemento e a memoria. Dos seus 4.000 visitantes, mais dun milleiro foron escolares que participaron nas visitas didácticas postas en marcha no marco da exposición.
A sociedade lucense puido gozar dunha oportunidade única para achegarse á orixe e evolución dunha cidade marcada pola Muralla, declarada Patrimonio da Humanidade pola Unesco, e sen perder nunca a escala humana da relación entre a súa veciñanza. Un percorrido polos grandes cambios urbanísticos de finais do século XIX e o despegue do século XX, con referencias ao seu papel como capital agrogandeira ou ás súas celebracións emblemáticas, como o San Froilán e o Arde Lucus, que quedan recollidas no seu correspondente catálogo, xa á venda.
Despois do paso por Santiago de Compostela (xuño-setembro 2022), Ferrol (novembro 2023-xaneiro 2024) e Lugo (marzo-maio 2023) e con 15.000 visitantes acumulados, o percorrido do proxecto expositivo Cidades no tempo continuará na Coruña en xullo cunha nova exposición. Vigo, Ourense e Pontevedra completarán este achegamento á cultura urbana de Galicia.