Evento: Korrontxi + Xabier Amuriza

O grupo de música tradicional Korrontzi foi fundado en 2004 por Agus Barandiarán, trikitilari da banda, desde o propósito de outorgar aos sons ancestrais da música folk vasca un aspecto contemporáneo. A súa música susténtase en instrumentos étnicos como a trikitixa (acordeón diatónico vasco), a txalaparta ou a alboka, xunto a outros máis modernos, como a mandolina, a guitarra ou o contrabaixo eléctrico.

Na súa traxectoria, a formación editou dez álbums, o último deles, Koplariak (Elkar, 2020). Despois de máis de quince anos sobre os escenarios, Korrontzi viaxou coa súa cultura, a súa lingua, danza e música singulares ao redor do mundo, e obtivo premios como os World Music Charts (2014, 2015, 2016 e 2020), e recoñecemento en forma de mencións como a de Mellor Banda Europea, en Eurofolk.

Koplariak foi gravado en pleno confinamento e contén novas composicións con letras de Xabier Amuriza, poeta improvisador en lingua vasca, escritor, investigador e músico, considerado o gran renovador do bertsolarismo, que colabora profusamente neste disco cunha das formacións máis emblemáticas da música popular vasca.