Evento: Cociñeiras ilustradas: Ángeles Díaz - Crema de arroz con cabaza e luras

Tirastes proveito destes meses do obrigado #quedanacasa para cociñar pratos cos pequenos  e pequenas da familia? Seguro que si! Por iso, agora podedes xuntos/as dar un chanzo máis na vosa destreza na arte dos fogóns con receitas animadas e sinxelas, e non por iso menos saborosas, para preparar e papar coa cativada, grazas ás nosas Cociñeiras ilustradas! Cada sábado contades cun novo e larpeiro plan de fin de semana que vos vai resultar un xeito divertido de achegarlles aos vosos nenos e nenas a cociña e o coñecemento de alimentos e hábitos saudables, que son moi importantes na súa nutrición e crecemento.

ÁNGELES DÍAZ

Vídeo-receita de Crema de arroz con cabaza e luras

Co álter ego Axóuxeres e chisqueiros, esta coruñesa (1989) é xeradora de historias a través da educación artística de día e contadora gráfica, a través da ilustración, á noite. Estudou Belas Artes na Universidade de Vigo e é mestrado en educación na Universidade da Coruña. Axóuxeres e chisqueiros xorde como resposta a todas esas historias gardadas nun caixón desde pequena e ás ganas de contar con imaxes.