Evento: Pezqueñín, el pequeño aventurero

Versión castelán. Recomendado a partir de 8 anos.

Programa formado por seis curtametraxes que teñen como escenario o fondo mariño.

Pezqueñín (Tiddler), Andy Martin, Alex Bain, Reino Unido, 2024, 24 min. Pezqueñín é un peixe moi pequeniño cunha gran imaxinación. Conta historias tan incribles que nin sequera as súas amizades da escola o cren. Pero un día, Pezqueñín consegue demostrar que a súa imaxinación pode ser un don marabilloso que incluso pode chegar a salvar vidas. Baseado no libro Tiddler the Story-Telling Fish, escrito por Julia Donaldson e ilustrado por Axel Scheffler, os creadores de O Grúfalo, entre moitas outras historias.

El barquito que quería volar, Ekaterina Filippova, Rusia, 2020, 7 min. Nunha fábrica xunto ao mar nacen barquiños e avións, e unha vez na gardaría, ensínanlles cales son as súas funcións. Pero un deles négase a aprender a ser un bo barco, porque o que en realidade desexa é voar.

Caparazón, varios autores, Francia, 2022, 6 min, sen diálogos. Nunha pequena cala francesa, Bernard, un cangrexo ermitán, perde a súa cuncha. Coa axuda do seu peculiar amigo Maurice, deberá enfrontarse aos perigos da praia para atopar unha nova coiraza.

¡Qué pez más extraño!, Krishna Chandran, Francia, 2017, 6 min. No medio do océano, un grupo de peixes xúntase para rescatar un peixe que flota na superficie. Deciden facer todo o posible para axudalo a volver á auga, sen saber que en realidade non é exactamente un peixe…

Tinta, Joost Van Den Bosch, Erik Verkerk, Países Baixos, 2020, 2 min., sen diálogos. Un polbo, fanático da orde e da limpeza, ponse nervioso cando o limpador do acuario deixa ben brillante a súa peixeira…

O estanque, Lena von Döhren, Suíza, 2023, 8 min., sen diálogos. Un banco de peixes nada de maneira perfectamente sincronizada no mar. Mais, de súpeto, aparecen as molestas gaivotas que alteran a formación e provocan que un peixiño se afaste do grupo.