Evento: Bailador

Bailador é unha peza de danza galega contemporánea baseada nas músicas de Berrogüetto, unha obra coreográfica que rende unha profunda homenaxe á nosa danza de raíz e a un grupo que transformou o xeito de entender e interpretar a música tradicional. 
Fronte ao mantra "O baile faino un home", este espectáculo reivindica o papel fundamental da muller galega como preservadora das formas tradicionais da nosa danza. A peza é así unha mostra de admiración e agradecemento a todas as mulleres que transmitiron a nosa danza de raíz, malia non atrevérense a "levar o baile" por temor ao rexeitamento nos seus círculos sociais. Bailador entende a danza tradicional desde a contemporaneidade dos nosos días, nun relato no que a música e o baile se explican a si mesmos desde o prisma do feminino.
Producida, dirixida e coreografíada por Óscar Cobos, e con Jaime Pablo Díaz ao cargo da dirección artística, a peza pon en escena a nove bailadoras de destacada traxectoria en diferentes agrupacións e asociacións folclóricas galegas, como Cantigas e Agarimos, Cántigas e Frores, Brincadeira ou Leilía. Ruth Pérez, Nerea Fouz, Rebeca Tallón, Cristina Canosa, Marta Mosquera, Nuria Gesteira, Uxía Portela, Eva Diago e Lorena Toimil son así as encargadas de darlle forma bailada aos temas de Berrogüetto, un grupo que transformou o xeito de entender os nosos sons tradicionais e que conta con recoñecementos como o premio Eversteiner ao mellor grupo de folk europeo (1998), finalista ao premio Grammy Latino ao mellor disco folk (2002), ou o Premio da Crítica Galicia en recoñecemento a toda a súa carreira musical.