Raíz/folk

Lobos  é o novo disco de Davide Salvado. Producido por Pedro Pascual (Talabarte, Marful), nel Davide vese arroupado por músicos do tamaño de Santi Cribeiro, Xavi Lozano, Quim Farinha , Miguel Hiroshi ou LAR Legido, entre outros. Os lobos inspiran este disco, como parte da Galicia máis pura e salvaxe. Desde os de Isaac Díaz Pardo para Sargadelos ata os que cantan e se convirten en home... ou ao revés.

Lobos está feito desde o corazón, é un agradecemento a todas esas pandereteiras e bailadoras maiores, mulleres fortes e anónimas, que ensinaron a Davide a ser o que é.

Indy Tumbita e Linda Lamarr (Thee Tumbitas, Pedrito Diablo & Los Cadáveras, Heroínas, etc) son agora Los Duques de Monterrey, a conexión entre as terras galegas e mexicanas en formato narcocorrido.
Los Duques de Monterrey que, atraídos pola etnia común e polo aire suave daquelas terras, deciden resolver a homenaxe ao mexicano en todas as súas vertentes. Así xorde o seu primeiro traballo no que conflúen o seu gusto polo corrido fuxido, o tex mex, o country, e a música de bandas sonoras, así como os textos de Rosalía de Castro e Juan Rufo.

Fiandola é un grupo compostelán creado no 1996 de música con raíz tradicional. Sendo tamén importante o son tradicional nas pezas de composición que inclúen no seu repertorio.
O grupo está composto por Pili Gonçalves, Antonio Suárez, Santi Budiño, Manolo Cobas, Marcos Saburido, Warren (Alberto Barreiro) e Fran López.

Presentan Volta e media, terceiro traballo discográfico. Este disco é froito dun longo traballo arredor da música tradicional en busca dun novo son máis fresco. Conta con 10 temas tradicionais e de composición.

Compositor, produtor e músico Kepa Junkera nace en Bilbao en 1965 e vive a súa infancia e mocidade no barrio de Rekalde.
Na súa discografía atopamos un primeiro disco chamado, Kepa, Zabaleta eta Motriku (1987), onde empeza a albiscarse a gran transformación que levará a cabo tanto na maneira de interpretar como de compoñer na trikitixa.

Martín Sanjurjo Sixto de San Sadurniño membro fundador dos grupos, Saraibas e Balakandra.
Manuel Dopico Orjales, arousán, membro fundador do grupo Leixaprén e compoñente dos grupos Maria Manuela, A Roda e Balakandra.

Co seu espectáculo "Cantares de opinión" fan un percorrido polos cantares dos grupos Saraibas e Balakandra sen esquecer outros que forman parte da historia da canción galega,e que seguen a ser precisos.

A Banda das Crechas é un grupo estable formado no bar A Casa das Crechas de Santiago de Compostela. No ano 2010 editaron o seu primeiro álbum, ABDC. A banda está formada por músicos que costuman xuntarse para tocar todos os mércores dos meses do curso escolar para interpretaren cancións e melodías tradicionais galegas e do resto do mundo. O seu repertorio, así como a duración dos concertos, vai en función da resposta do público.

Desde 1998, Barahúnda evolucionou sempre ao redor da voz do seu líder, a cantante e investigadora Helena de Alfonso, xunto ao compositor José Lara Gruñeiro. Todo este tempo esforzouse en facer chegar ao público as sensacións contidas en letras e melodías que, incluso remontándose ao século XI, falan de emocións comúns a todos os seres humanos.

Tentan entregar ao público o tango como nunca antes quizais llo contaron e cantaon.
Son de onde veñen, de onde están e cara a onde partirán, pero Arxentina viunos nacer, son Néstor Branco (guitarra), Emilce Rosana (voz) e Daniel Rilo (relatos), coa colaboración de Alejandro Szabo (bandoneón).
Aprenderon de todos para tentar quedar co bo, sen copiar, pero si para render tributo e acrecentar todo o seu acervo cultural e musical.

Toques do Caramulo é o nome dun dos mellores grupos en vivo do folk portugués. A banda conecta o son áspero e orixinal do centro de Portugal con arranxos contaxiosos, frescos e modernos. Ao facelo, achegan o seu saber facer como músicos renovando cancións parcialmente esquecidas, ás veces ironicamente interpretadas, pero sempre acompañadas dun gran respecto pola orixe e as tradicións do pobo da Serra do Caramulo, describindo a beleza da súa patria nas súas cancións.

Davide Salvado (Marín, 1981) é sen dúbida unha das voces máis carismáticas do noso país. De formación autodidacta, leva media vida recorrendo as aldeas galegas na procura de ritmos, coplas e danzas. De todas esas mulleres que foi atopando, aprendeu non só a tradición na música, se non todo un xeito de vivir. O amor a todas esas prácticas tradicionais, a fía, a cestaría, a agricultura, o respeito á terra e á lingua, fan do xeito de entender o canto para Davide moito máis que simplemente música.