Proxección audiovisual

Alemaña do Leste, 1989. O muro que divide o país en dúas metades está a piques de derrubarse. Fritzi, de doce anos, coida de Sputnik, o cachorro da súa mellor amiga Sophie, mentres ela está de vacacións coa súa familia en Hungría. Mais chega o outono e comeza o colexio e Sophie non regresou. Fritzi e Sputnik inician unha aventura para atopala. Os seus pasos lévanos a descubrir as manifestacións que se repiten en Leipzig e a entender que está a pasar no seu país.

Tasio aprende o oficio de carboeiro e de cazador furtivo de seu pai. É unha existencia tan sinxela como dura, que el asume con enteireza e orgullo. Conforme vai medrando, decide deixar de traballar para os poderosos que explotan o seu xornal e vivir do que a montaña poida darlle, nin máis nin menos. Os seus amigos vanse á cidade, mais Tasio, nin casando e sendo pai, abandonará o seu estilo de vida.

Serie de curtametraxes centradas nos artistas Joan Miró e Carles Santos.

OS ROMEIROS DO ALÉN. A Romaría de Sta. Marta de Ribarteme exemplifica como cando unha comunidade conta cun baixo desenvolvemento tecnolóxico na súa medicina, ou cando esta non responde favorablemente, a conciencia popular acode ao sagrado como instancia suprema. Así, o que estivo a piques de morrer e, por intercesión da Santa, logrou salvarse, teatraliza o milagre acudindo á festa das mortallas dentro da caixa que o tería que levar ao camposanto. Esta posta en escena é un medio de fortalecer a fe da comunidade, ao tempo que proporciona pingües beneficios aos axentes da relixión oficial.

Adaptación do clásico de Robert Louis Stevenson, no que o doutor Jekyll está obsesionado co estudo do lado escuro do ser humano, que pretende controlar con métodos científicos. Crea un elixir para liberar a súa vertente máis tenebrosa e experimentar cunha escisión forzada da súa identidade, pero aos poucos ese dobre seu, o señor Hyde, acabará por tomar o control.

A vida cotiá de dous amantes adúlteros.

Diario de viaxe polo mar de Aral, antigamente un dos lagos máis grandes do mundo, hoxe reducido ao 10% da súa superficie. Pagán intercala imaxes propias tiradas da convivencia alá cun grupo de cazadores da estepa –en dúas etapas, nos veráns de 2018 e 2023– con refilmacións das pezas Memoria (Nerea Barros, 2021) e Man of Aral (Helena Gouveia Monteiro, 2024) en superficies acuosas, puntuadas por extractos en off do seu libro Jalundes e pinturas do museo de arte Igor Savitsky.

Proxéctase xunto ás dúas curtas referenciadas. Presentación e coloquio co autor.

Unha maldición persiste na casa Baskerville, de Devonshire, desde hai séculos. A infamia dun dos seus devanceiros, que violou e asasinou unha muller, provocou que a desventura caia sobre os herdeiros, atacados ata a morte por unha criatura que vaga polas noites nos seus pantanosos terreos. Tras un novo falecemento en estrañas circunstancias, o testamenteiro familiar contrata o famoso detective Sherlock Holmes para esclarecer os feitos e velar pola seguridade de sir Henry, a nova cabeza do clan Baskerville.

Despois de que John, un neno de 13 anos, atrape a súa familia nun buraco no chan, desenvólvese un desesperado xogo de supervivencia neste inquietante thriller psicolóxico.

Pequena sensación indie no cinema de xénero, que conquistou festivais como Sundance e Cannes. Tras a cámara, o ferrolán Pascual Sisto; foi recoñecido como director emerxente nos certames de Deauville e Palm Springs.

Documental que trata sobre a figura de Correa Corredoira, un pintor notable, nacido na Coruña e que desenvolve o seu traballo desde os anos 80. Creador do grupo Orzán e membro destacado do grupo Atlántica, ten un universo propio que expresa a través da pintura, a escultura e o gravado. No documental acudimos ao seu estudio, preguntámoslle sobre todos os temas do seu interese e observamos o seu proceso creativo, en que nos mostra a súa personalidade. Tamén destaca a súa obra poética.