O Vello Cárcere recrea os últimos 30 anos de excavacións arqueolóxicas en Lugo coa exposición Desenterrar o pasado: un percorrido pola arqueoloxía de Lugo, que pon o broche de ouro ao ciclo de conferencias, que baixo o mesmo título que a mostra, serviu para pór en valor o rico patrimonio arqueolóxico da cidade e a súa importancia dende o punto de vista histórico, a través de distintas xornadas, nas que participaron unhas 650 persoas.
Coplas de cego. José Solla é a exposición que compila a traxectoria deste artista marinense que desenvolve a súa pintura entre Bueu e Mar del Plata.
Máis de corenta anos despois de acadar o primeiro premio na II Bienal Internacional de Arte da Deputación de Pontevedra en 1976, esa mesma institución, a través do Museo de Pontevedra, acolle unha gran exposición que reflicte boa parte do que foi a súa longa traxectoria no mundo da arte, formulada sempre entre dous espazos físicos, pero tamén sentimentais e sensoriais.
Afundación, a Obra Social de Abanca, albergará na súa sede da Coruña a exposición Dúas expresións, da pintora Novais e o escultor Antonio Souto.
Natural da Coruña, Novais formouse na Escola Pablo Picasso e tamén ten coñecementos en arquitectura de interiores, gravado, litografía, xilografía e talleres de arte. Como pintora realizou exposicións en diferentes cidades españolas, ademais de París, América do Norte ou Portugal.
Co gallo do 550 aniversario da morte de Johannes Gutenberg (1468-2018), a Biblioteca Pública de Lugo prepara unha exposición da evolución da historia dos libros a través dos seus fondos. Gutenberg foi o inventor da impresión con tipos móbiles en Europa. Coa súa achega fixo posible a multiplicación mecánica dos textos, así como o progreso do coñecemento e abriu un mundo novo de comunicación. Farase unha viaxe, partindo do libro manuscrito, pasando polos incunables e chegando finalmente aos libros impresos.
18 artistas e 21 autógrafos: eses son os protagonistas da mostra que achega na Biblioteca de Galicia aos visitantes aos pintores galegos dun xeito diferente. En 24 paneis, os asistentes poderán descubrir a obra e a bibliografía vinculada aos pintores protagonistas.
O ciclo Metrópole. Perspectiva urbana da arte galega intenta unir a viaxe no tempo, percorrendo o Vigo dos anos vinte, e ofrecer unha visión do panorama artístico galego actual, para o que contará cunha serie de exposicións individuais de artistas galegos (da que a primeira será a de Xosé Manuel Castro, con Pedra filosofal).
Comisariada por Santiago Olmo, a exposición propón un acercamento á idea de construción a partir da obra de artistas moi dispares que non obstante comparten un interese pola análise e as metodoloxías propias da construción.
As estreitas relacións entre arte e arquitectura ao longo do século XX converteron a idea de construción nunha clave imprescindible para comprender a nosa relación co espazo, a paisaxe e a casa, pero sobre todo coa vivencia práctica do obxecto artístico.
Nicolás Combarro propón no CGAC outro xeito de comprender a arquitectura, empregando a fotografía para reinterpretar e recrear diferentes espazos arquitectónicos.
A Fundación Barrié presenta na súa sede da Coruña a exposición da artista mexicana Graciela Iturbide, considerada como unha das fotógrafas máis influentes de América do Sur. A mostra, composta por 186 fotografías, propón unha viaxe transversal pola obra de Graciela Iturbide que, partindo das súas imaxes máis antigas, chega ata a súa obra máis recente. Sen atender a unha estrita orde cronolóxica, os seus proxectos máis representativos quedan ligados a aquelas temáticas que mellor definen o seu poderoso imaxinario creativo.
A Casa das Peritas, estudio de arte e galería ocasional da artista moldava Natasha Lelenco, abrirá portas de novo este verán cunha proposta expositiva que combinará o traballo pictórico da promotora do espazo xunto cunha selección de obras dunha artista convidada, que nesta ocasión é Luisa Álvarez, artista de orixe ourensana afincada en Madrid que emprega a luz como canle de comunicación e elemento plástico. Tanto en proxectos individuais como exposicións colectivas, a súa obra foi exposta en espazos como La Neomudejar, El Matadero (Madrid), ou o Museo Guggenheim de Nova Iorke.
