Nova: O Consello da Cultura Galega elaborará unha diagnose para a Estratexia da Cultura de Galicia 2021 da Xunta

Santiago de Compostela, 25 de outubro de 2017.- O Goberno galego está avanzando na elaboración da Estratexia da Cultura de Galicia 2021, un documento que será a folla de ruta da planificación da acción cultural da comunidade autónoma para os vindeiros catro anos e na que se fixarán obxectivos, liñas estratéxicas e medidas concretas co obxectivo de fortalecer a nosa industria cultural como piar na creación de riqueza e emprego.

Ao abeiro desta iniciativa, o conselleiro de Cultura, Educación e Ordenación Universitaria, Román Rodríguez, e mailo presidente do Consello da Cultura Galega (CCG), Ramón Villares, asinaron hoxe un acordo de colaboración polo cal este organismo se encargará de elaborar unha diagnose da cal se nutrirá a estratexia, que, segundo avanzou o conselleiro, se prevé que estea rematada o vindeiro verán. No acto tamén estiveron presentes o secretario xeral de Cultura, Anxo Lorenzo, e o xerente do CCG, Marcelino Fernández.

Recollida de datos e xuntanzas sectoriais

Deste xeito, o Consello da Cultura -a través do Observatorio da Cultura Galega- encargarase de recoller datos cualitativos e cuantitativos relevantes dos sectores culturais (editorial, letras, audiovisual, artes escénicas, artes visuais, patrimonio, institucións da cultura,...); así como reflexións estratéxicas e liñas de actuación sobre temas transversais como o financiamento da cultura, gobernanza, ámbito dixital e tecnolóxico, internacionalización, cultura e educación, inclusión cultural, e turismo entre outros.

Xunto coa análise empírica e diagnóstica que fará o CCG, a Consellería iniciará unha serie de xuntanzas territoriais e sectoriais con todos os axentes implicados no marco dun proceso participativo de reflexión e diálogo no que se integren institucións, entidades de base, asociacionismo, profesionais, empresas culturais, entre outros.

O obxectivo final é dispoñer dun documento rigoroso con obxectivos, liñas estratéxicas e medidas concretas para fortalecer a industria cultural galega como piar de dinamización económica e social, de vertebración territorial e xeradora de inclusión e de oportunidades.

Un proceso aberto

Segundo indicou Román Rodríguez, esta será a primeira vez que Galicia conte cunha estratexia destas características, froito do diálogo e a cooperación entre administracións, sectores e operadores culturais. O conselleiro incidiu en que se trata dun proceso “aberto e participativo” co obxectivo final de potenciar a cultura como elemento tractor económico e social.

Pola súa banda, Ramón Villares destacou a necesidade de dispor dun diagnóstico e a “oportunidade” de contar cunha Estratexia en materia de cultura co fin de vertebrar proxectos e coordinar actividades. Neste senso, sinalou que o Consello da Cultura Galega conta xa cunha serie de documentos, estudos, informes e investigacións que haberá que actualizar, pero que servirán de punto de partida para a elaboración desta análise do sector.

A Estratexia da Cultura de Galicia 2021 estará estruturada en eixos sectoriais básicos: sector editorial e literario, sector audiovisual, sector musical, artes escénicas, artes visuais e plásticas, e patrimonio cultural.