Nova: Xunta e Deputación abordan co equipo de César Portela a futura obra do Teatro Cine Fraga

Santiago de Compostela, 23 de xullo de 2025

O conselleiro de Cultura, Lingua e Xuventude, José López Campos, mantivo hoxe unha reunión co equipo técnico de César Portela para abordar, en coordinación coa Deputación de Pontevedra, a futura obra do Teatro Cine Fraga de Vigo. No encontro, o conselleiro trasladou que o Goberno galego prevé rematar a vindeira semana os pregos da contratación para que sexa o arquitecto César Portela, autor e propietario intelectual do proxecto orixinal e director da obra xa executada, quen continúe coa tarefa de rematar os traballos do inmoble. 

No senso desta xuntanza, o representante do Executivo autonómico salientou que co inicio dos trámites para a terminación das obras, a Xunta de Galicia “cumpre con Vigo, unha cidade que está cada vez máis preto de poder contar cunha programación ambiciosa e de calidade”. Así mesmo, trasladou que o obxectivo de ambas as dúas administracións é “respectar a intervención realizada no proxecto orixinal facendo as actualizacións que sexan precisas”. 

Deste xeito, a finalidade é recuperar o edificio para transformalo nun espazo arquitectónico flexible e polivalente que favoreza a produción, experimentación e divulgación de contidos no eido escénico, musical, audiovisual e literario, ademais dun espazo museístico no que preservar, destacar e compartir os vencellos deste edificio co desenvolvemento do cinema na cidade olívica e en Galicia. Para isto, tal e como puxo en valor López Campos, o Goberno galego e a Deputación de Pontevedra xa teñen deseñado o plan de usos destinado a converter este emblemático inmoble “nun referente de primeiro nivel no noroeste peninsular”. 

Por outra banda, lembrou que esta folla de ruta, coas liñas estratéxicas sobre os seus contidos e programación, ten en conta as “valiosas achegas e suxestións que recibimos por parte da cidadanía e a comunidade cultural a través da campaña O mellor espazo busca o mellor contido, que incluíu reunións presenciais e unha caixa de correo virtual”. Así, ao abeiro destas propostas, prevese tamén a posta en marcha dunha ambiciosa programación que inclúe residencias artísticas, actividades e obradoiros, dirixidos á infancia e á mocidade que estimulen a creatividade e a experimentación, vencellados á escritura creativa, á composición musical e á produción audiovisual. Finalmente, a cafetería tamén contará cunha definición de usos específica, xa que ademais de servir de punto de encontro informal entre a cidadanía e este novo espazo cultural, vaise habilitar para determinados eventos e o desenvolvemento dunha programación concreta.