Nova: López Campos resalta o compromiso da Xunta coa conservación dos bens eclesiásticos e do Camiño

Lugo, 30 de xuño de 2025

O conselleiro de Cultura, Lingua e Xuventude, José López Campos, acompañado polo director xeral de Patrimonio, Ángel Miramontes, participou hoxe na apertura das XLIII Xornadas Nacionais de Patrimonio Cultural da Igrexa en España, que se celebrou no Seminario Diocesano de Lugo baixo o título Paisaxe cultural: patrimonio, cultura e fe, onde lembrou “o compromiso do Goberno galego coa conservación dos bens culturais que atesoura o noso territorio, moitos deles vencellados á igrexa, e especialmente os que se atopan nas rutas xacobeas que, xunto coa paisaxe natural, fan dos Camiños un patrimonio extraordinario”.

Así, durante o encontro, no que se tratarán ata o vindeiro xoves varios temas que teñen que ver co Camiño de Santiago, a candidatura a Patrimonio Mundial da Ribeira Sacra, o patrimonio cultural eclesiástico e a paisaxe cultural, o representante da Xunta apuntou que actualmente Galicia conta con 789 monumentos coa máxima protección tras as últimas declaracións como Ben de Interese Cultural, “hoxe mesmo aprobamos no Consello a declaración como BIC da Rapa das Bestas e a semana pasada a Ofrenda do Antigo Reino de Galicia”. Unha boa mostra, puntualizou, “de que o patrimonio cultural dun pobo é resultado do importante legado que recibimos dos nosos devanceiros, grazas ás expresións artísticas, pero tamén ás tradicións, os costumes ou as crenzas”.

Neste senso, López Campos tamén se referiu á colaboración estable que desde a Xunta se mantén coas distintas dioceses galegas para velar polo patrimonio cultural. “Acabamos de renovar o Convenio Mixto a través do que destinamos 600.000€ este ano a intervencións de restauración en igrexas parroquiais polo seu alto valor artístico, cultural e histórico e no que levamos investido 1,2 M€ desde 2019”, apuntou.

Así mesmo, destacou o desenvolvemento por parte do Goberno autonómico do Plan Catedrais de Galicia, unha folla de ruta dotada con 38 M€ para manter nas mellores condicións os grandes templos galegos co horizonte posto en 2027, “garantindo que gocen do seu maior esplendor tanto para a nosa propia veciñanza como para recibir do mellor xeito aos visitantes”.

Candidatura da Ribeira Sacra

Ao abeiro da temática deste programa, o conselleiro de Cultura, Lingua e Xuventude resaltou a Ribeira Sacra, que está na súa recta final do proceso que busca a súa declaración como Patrimonio Mundial por parte da Unesco, como “un territorio que reúne un variado patrimonio cultural eclesiástico con igrexas e importantes mosteiros, que se unen á súa riqueza natural e paisaxística, ao redor da auga, e a un rico patrimonio etnográfico e inmaterial no que podemos destacar distintas tradicións locais”.

Neste contexto, López Campos aproveitou para lembrar o “esforzo e intenso traballo” por parte do Goberno galego coa candidatura Ribeira Sacra: Paisaxe da auga, sinalando os preto de 8 M€ que a Xunta ten investido na conservación e posta en valor de máis de 40 bens patrimoniais deste territorio das provincias de Ourense e Lugo. En concreto, ao longo deste período, a Administración autonómica executou, en solitario ou en colaboración con outras institucións e concellos, máis de 90 actuacións tanto en materia arquitectónica como arqueolóxica en diferentes bens, como igrexas, mosteiros, museos, castros ou xacementos romanos.